Zeremi 52 - Labib An Kreol Seselwa

Lennmi I Kaptir Zerizalenm

¹ Sedesyas ti annan 21 an kan i ti vin lerwa; i ti renny 11 an dan Zerizalenm. Son manman ti apel Hamoutal; i ti fiy Zeremi ki sorti Libna.

² I ti fer sa ki mal devan SENYER, parey Yoyakim.

³ Zerizalenm ek Zida ti provok lakoler SENYER ziska i ti rezet zot, lwen avek li. Sedesyas ti revolte kont lerwa Babilonn.

⁴ Dan nevyenm lannen son renny, dizyenm mwan, dizyenm zour, Naboukodonozor, lerwa Babilonn, ti atak Zerizalenm avek tou son bann gerye. I ti anserkle li. Zot ti konstri bann lenstalasyon latak toultour lavil.

⁵ Alor, lavil ti ganny anserkle ziska onzyenm lannen dan renny Sedesyas.

⁶ Nevyenm zour dan katriyenm mwan, sa menm lannen, lafanmin ti'n vin sitan for dan lavil, ki ti nepli annan manze.

⁷ Alor, en trou ti ganny ouver dan miray lavil. Dan lannwit, lerwa avek tou bann gerye ti sove par laport ki ant sa de miray kot zarden lerwa, menm si bann Babilonyen ti ankor otour lavil. Zot ti sov dan direksyon Araba.

⁸ Me bann gerye Babilonyen ti pourswiv lerwa Sedesyas e atrap li dan laplenn pre Zeriko; tou son bann gerye ti'n ganny disperse; zot ti'n abandonn li.

⁹ Zot ti fer lerwa prizonnyen e anmenn li, Ribla, devan lerwa Babilonn ki ti pas santans kont li.

¹⁰ Lerwa Babilonn ti fer touy bann zanfan Sedesyas devan son lizye; i ti osi fer touy bann zofisye, Ribla.

¹¹ Apre sa, i ti krev lizye Sedesyas, atas li avek lasenn e anmenn li Babilonn. I ti reste dan prizon ziska son lanmor.

Bann Babilonyen I Detri Tanp Zerizalenm

¹² Dizyenm zour, senkyenm mwan, dan diznevyenm lannen renny Naboukodonozor, lerwa Babilonn, Nebouzaradann, sef bann gard lerwa, ti antre dan Zerizalenm.

¹³ I ti met dife dan tanp SENYER, pale lerwa ek tou bann lakaz dan Zerizalenm. I ti bril tou bann gran lakaz.

¹⁴ Tou bann gerye Babilonyen ki ti avek li, ti demoli tou bann miray ki antour Zerizalenm.

¹⁵ Nebouzaradann, sef gard rwayal, ti deport Babilonn leres bann zabitan dan lavil: Bann ki ti'n abandonnen pour al zwenn avek lerwa Babilonn, ansanm avek bann zouvriye kalifye.

¹⁶ Me Nebouzaradann, sef bann gard rwayal, ti kit deryer dan pei bann ki ti pli pov dan pei, pour zot travay dan bann plantasyon rezen e koman kiltivater.

¹⁷ Bann Babilonyen ti kas an morso bann kolonn an bronz avek son sipor ek gran basen an bronz ki ti dan tanp SENYER. Zot ti anmenn tou sa bronz Babilonn.

¹⁸ Zot ti osi anmenn tou bann resipyan: Bann po, lapel, tennywar lalanp, tou bann istansil an bronz ki ti ganny servi pour servis tanp.

¹⁹ Sef gard rwayal ti pran bann pti kivet, bol pour bril lansan, lakoup pour tenir disan ki servi pour sakrifis, resipyan pour anmas lasann, portlanp bann bol ki servi pour lansan, e bann bol ki servi pour lofrann diven. I ti pran tou bann lobze annor e annarzan.

²⁰ Sa de kolonn, sa gran basen, sa 12 pti toro an bronz ki lerwa Salomon ti'n fer pour tanp, tousala ti enposib peze.

²¹ Sak kolonn ti mezir nef met oter e sis met larzer. Anndan ti vid e i ti annan wit santimet lepeser.

²² Par lao sa kolonn ti annan en kornis an bronz ki ti de met edmi oter. Sa kornis ti ranpli avek en dekor dan laform grenad ki ti osi an bronz ti'n grave lo la.

²³ Ti annan 96 grenad lo bann kote; an tou, ti annan 100 grenad grave otour pilye.

Zabitan Zida I Ganny Deporte Babilonn

²⁴ Sef gard rwayal, ti fer aret Gran-Pret Seraya, son segon, Sofoni ek trwa gardyen laport tanp.

²⁵ Dan lavil i ti fer aret en zofisye ki ti ansarz bann gerye, set zonm ki ti parmi lantouraz lerwa. I ti osi fer aret sekreter komandan larme ki ti ansarz pour anrol dimoun dan larme e 60 zonm parmi zabitan pei, ki ti ankor dan lavil.

²⁶ Nebouzaradann ti anmenn zot kot lerwa Babilonn ki ti dan lavil Ribla,

²⁷ ki dan teritwar Hamat. La, lerwa ti met zot tou anmor. Konmsa ki pep Zida ti ganny deporte lwen avek son pei.

²⁸ La kantite dimoun ki Naboukodonozor ki fer deporte: Dan setyenm lannen ki i ti lerwa: 3,023 sorti Zida.

²⁹ Dan dizwityenm lannen ki i ti lerwa: 832 sorti Zerizalenm;

³⁰ dan ventrwazyenm lannen ki Naboukodonozor ti lerwa, Nebouzaradann, sef bann gard ti deport 745 Zwif. An tou, 4,600 dimoun ti ganny deporte.

Lerwa Babilonn I Liber Yoyakin

³¹ Dan lannen ki Evil-Merodak ti vin lerwa Babilonn, i ti grasye Yoyakin, lerwa Zida, ki i ti fer sorti dan prizon. Sa ti ariv lo vennsenkyenm zour, trwazyenm mwan, trannsetyenm lannen apre ki Yoyakim ti'n ganny deporte.

³² Evil-Merodak ti tret li byen. I ti donn li en pozisyon pli o ki lezot lerwa ki ti annegzil avek li Babilonn.

³³ Konmsa, Yoakin ti ganny permisyon pour li tir son lenz prizonnyen. Tou son lavi diran, i ti manz lo menm latab avek lerwa Babilonn.

³⁴ Tan ki Yoyakim ti vivan, lerwa Babilonn ti donn li tou sa ki i ti bezwen pour viv tou le zour.