Zeremi 46 - Labib An Kreol Seselwa

Defet Larme Ezipsyen Karkemis

¹ SENYER ti adres profet Zeremi konsernan bann diferan nasyon etranze.

² Lo size Lezip: Konsernan larme Faraon Neko, lerwa Lezip ki ti lo larivyer Efrat, dan Karkemis, e ki ti'n ganny bate par Naboukodonozor, lerwa Babilonn, dan katriyenm lannen renny Yoyakim, garson Zosyas, lerwa Zida:

³ Prepar zot bann boukliye, bann ki gran ek bann ki pti. Annavan pour atake!

⁴ Prepar bann seval. Atake avek bann kales lager! Prepar zot pour met zot kas! Fit zot lans! Met zot proteksyon lager!

⁵ Akoz mon war zot dan lafreyer? Zot pe rekile? Zot bann gerye in ganny bate; zot in sove osi vit ki zot kapab. Zot pa get deryer zot. Laterer in antour zot, SENYER i deklare.

⁶ Menm gerye ki tay pli vit pa kapab sove. Bann meyer konbatan i ganny atrape. Laba, dan Nor, obor larivyer Efrat, zot perdi lekilib e zot tonbe.

⁷ Lekel sa enn ki pe monte parey larivyer Nil, parey en larivyer ki pe deborde?

⁸ Lezip pe monte parey larivyer Nil, parey bann larivyer ki pe deborde. Lezip ti dir: Mon pou deborde e mon pou kouver later. Mon pou detri bann lavil ek zot bann zabitan.

⁹ Bann seval! Atake. Bann kales lager! Bann gerye ki sorti Letyopi ek Pout; ki mannye bann boukliye; lezot gerye ki sorti Loud e ki konn mannye fles! Fonse.

¹⁰ Sa zour, i zour Senyer BONDYE liniver: Sa zour, i en zour revanz. Sa zour, i pou pini son bann lennmi. Lepe, parey en mons pe devor zot avek gran lapeti, e bwar zot disan ziska ler i sou. Ozordi, dan Nor, obor larivyer Efrat, sakrifis pe ganny ofer an loner Senyer BONDYE liniver.

¹¹ Bann Ezipsyen! Monte ziska Galaad pour zot rod en latizann ki pou geri zot bann blesir. Me sa pa servi dan nanryen akoz zot bann blesir pa pou geri.

¹² Tou bann nasyon in aprann ou laont; partou, dimoun in antann ou pe kriye. Bann gerye i tap ek kanmarad e tou le de zot tonbe.

Lezip I Ganny Anvai

¹³ La sa ki SENYER ti anonse, par lentermedyer profet Zeremi, konsernan latak Naboukodonozor, lerwa Babilonn lo Lezip:

¹⁴ Al anons sa nouvel dan bann lavil Lezip, dan Migdol, Menmfis, Tafanes: Debout! Met zot pare; akoz lager in deza detri zot vwazen!

¹⁵ Akoz Apis in sove? Akoz eski in degrengole kan SENYER in bouskil li?

¹⁶ SENYER in fer tonbe bokou zot bann gerye. Zot tonm enn lo lot, zot dir avek kanmarad: Leve! Annou retourn dan nou pei kot nou bann zans, avan ki lennmi i masakre nou.

¹⁷ Laba, zot pe kriye: Faraon, lerwa Lezip i zis fer tapaz; in rat son sans.

¹⁸ Mwan, sa lerwa ki apel SENYER liniver, mon deklare: Osi vre ki mon vivan, lennmi pe vini. Osi vre ki montanny Tabor i pli o parmi bann montanny; osi vre ki montanny Karmel i domin lanmer, i pe vini.

¹⁹ Pep Ezipsyen! Anmas ou pake; prepar ou pour al annegzil. Lavil Menmfis pour vin parey en dezer; en ta debri san okenn zabitan.

²⁰ Lezip i parey en zoli zenis ki'n ganny pike par en mous ki sorti dan Nor.

²¹ Menm bann mersener byen angrese parey bann toro ti vire e sove san okenn rezistans. Akoz sa zour katastrof ti'n tonm lo zot, zot zour rann kont ti'n arive.

²² Lezip li, ti glise parey en serpan. Lennmi ti atak akoud gran lars ki servi pour koup pye dibwa.

²³ SENYER i deklare: Menm si lafore i epe e ki ou pa kapab traverse, zot pou detri tou. Akoz, zot pli nonbre ki bann sotrel: Ou pa kapab konte konbyen zot i annan.

²⁴ Sa zoli Lezip in ganny imilye. In tonm anba dominasyon en pep sorti dan Nor.

²⁵ La sa ki SENYER liniver, Bondye Izrael i deklare: Mon pou pini Amonn, bondye lavil Teb. Mon pou osi pini Faraon ek tou Lezip antye, son bann bondye e son bann lerwa. Wi! Mon pou pini Faraon e tou sa bann dimoun ki met zot konfyans dan li.

²⁶ Mon pou livre zot avek sa bann dimoun ki oule zot lanmor: Naboukodonozor lerwa Babilonn ek son bann gerye. Me plitar, Lezip pou ganny repeple, parey i ti ete dan letan pase, SENYER i deklare.

Senyer I Promet Sov Son Pep

²⁷ Me ou, Izrael, mon serviter! Mon pep! Pa bezwen per! Pep Izrael! Pa perdi kouraz! Mon pou sov ou, mon pou fer ou sorti dan pei lwenten, pei kot ou prizonnyen. Ou pou retourn dan ou pei kot ou ava viv anpe; ou pou an sekirite e personn pa pou vin fer ou per.

²⁸ Izrael! Ou ki mon serviter, Pa bezwen per, SENYER i deklare. Mon pou vin sov ou. Mon pou detri tou bann nasyon kot mon ti fer ou ganny deporte. Me mon pa pou detri ou. Menm si mon ti bezwen pini ou akoz ou ti merite, mon pa ti kapab tret ou koman en inosan.