Zeremi 45 - Labib An Kreol Seselwa

Bondye I Promet Proteksyon pour Barouk

¹ Dan katriyenm lannen, kan Yoyakim, garson Zozyas, ti lerwa Zida, Zeremi ti dikte son mesaz avek Barouk, garson Neriya:

² La sa ki SENYER, Bondye Izrael i dir ou Barouk:

³ Ou ti dir: Maler! SENYER in azout douler lo mon lapenn. Mon fatige afors plennyen. Mon napa repo.

⁴ La sa ki ou ava dir li: Mon pe al demoli sa ki mon ti'n konstri; mon pe al derasin sa ki mon ti'n plante partou dan pei.

⁵ E ou? Eski ou pe rod gran keksoz pour ou? Pa rode, akoz mon pe anvoy maler lo tou dimoun. Me ou, mon pou protez ou lavi koman en depouy lager, partou kot ou pou ale.