Zeremi 4 - Labib An Kreol Seselwa

Bondye I Apel Izrael pour Repanti

¹ La sa ki SENYER i deklare: Izrael! Si ou retournen, kot mwan ki ou devre retournen. Si ou tir devan mwan sa bann fo bondye degoutan, ou pou nepli bezwen viv koman en vagabon.

² Si ou deklare senserman, e an verite: Mon fer serman devan SENYER ki vivan; alor, tou lezot nasyon ava demann mwan beni zot e zot ava loue mwan.

³ La sa ki SENYER i deklare avek bann zabitan Zida ek Zerizalenm: Defris en nouvo bout later; aret senm parmi brousay.

⁴ Zot ki viv dan Zida e zot bann zabitan Zerizalenm, sirkonsi zot pour SENYER. Sirkonsi zot leker pour li. Sankwa, akoz pese ki zot in komet, mon lakoler pou tonm lo zot, e bril zot parey en dife ki pou devaste tou san ki i annan personn pour tennyen.

Lenvazyon Zida Sorti dan Nor

⁵ Al anonse dan Zida! Dir zot: Al proklanmen dan Zerizalenm! Soufle tronpet atraver pei! Kriy byen for avek bann zabitan: Rasanble zot; annou al kasyet dan bann lavil fortifye.

⁶ Met en poto pour montre direksyon Siyon. Pa tarde al rod en labri. Pa aret dan semen. SENYER pe anvoy en dezas e en gran destriksyon sorti dan Nor.

⁷ Destrikter bann nasyon pe vini. Parey en lyon, in sorti dan son landrwa kasyet. I pou detri zot pei. Zot bann lavil pou ganny detri e reste abandonnen.

⁸ Pour sa rezon, met zot lenz dey; plere, lamante, akoz SENYER pe devers son gran lakoler lo zot.

⁹ Kan sa zour pou arive, SENYER i deklare, lerwa ek son bann zofisye pou perdi kouraz; bann pret pou soke, e bann profet pou reste etonnen.

¹⁰ Alor, mon ti dir, “Senyer BONDYE, ou'n vreman tronp sa pep; ou'n tronp bann zabitan Zerizalenm. Ou ti asir zot ki pou annan lape, me la, lepe i anba zot lagorz.”

¹¹ SENYER pou dir bann zabitan Zerizalenm: En divan so ki sorti dan dezer, pe vin soufle lo mon pep. I pa en labriz pour vannen, ni pour netwaye.

¹² Sa i en gro divan ki pou soufle lo mon lord. Aprezan, mon pou pronons mon zizman kont zot.

Lennmi I Anserkle Zida

¹³ Gete! Lennmi pe vini parey en nyaz. Son bann kales lager i roul parey en tourbiyon. Son bann seval i pli vit ki bann leg. Maler i lo nou! I'n fini pour nou!

¹⁴ Zabitan Zerizalenm! Si zot oule ganny delivre, lav zot leker avek tou son bann mesanste. Kan eski zot pou debaras zot avek zot bann move panse?

¹⁵ Ekoute! Bann mesaze sorti dan rezyon Dann, pe anons move nouvel ki sorti dan montanny Efraim.

¹⁶ Zot pe vin averti bann nasyon e fer Zerizalenm konnen ki lennmi pe vini, sorti lwen.

¹⁷ Lennmi in anserkle Zida ek Zerizalenm. Zot parey bann gardyen ki vey en plantasyon. Sa i akoz zot in revolte kont mwan, SENYER i deklare.

¹⁸ Tousala i ariv lo ou akoz mannyer ou'n viv e akoz tou sa ki ou'n fer. Ou pese i lakoz ou soufrans, ziska in pers ou leker.

Zeremi I dan Lapenn pour Son Pep

¹⁹ Zot! Mon vant i fer mal. I vreman fer mal! Mon leker pe palpit anmor. Mon pa kapab reste trankil. Mon bezwen koze. Mon antann tronpet pe soufle ek bann tapaz lager.

²⁰ Dezas pe vin enn deryer lot; pei antye in ganny ravaze. En sel kou, nou bann latant in ganny detri; zot bann rido in desir an morso.

²¹ Konbyen letan ankor mon pou war bann bannyer lager e antann tronpet lager sonnen?

²² Mon pep i san konpran. Zot pa konn mwan koman zot Bondye. Zot parey bann zanfan fou, ki pa konpran nanryen. Zot eksper dan fer sa ki mal, me zot pa konn fer sa ki byen.

Vizyon Zeremi lo Destriksyon Zerizalenm

²³ Mon ti get later; mon ti war li vid, san okenn laform. Mon ti get lesyel; ti nepli annan okenn lalimyer.

²⁴ Mon ti gete: Bann montanny ti pe tranble, e bann kolin ti pe sekwe.

²⁵ Mon ti gete: Mon pa ti war okenn zabitan, e tou bann zwazo ti'n sove.

²⁶ Mon ti gete: Sa pei fertil in vin en dezer; tou son bann lavil ti'n ganny detri. Tousala, in arive akoz gran lakoler SENYER.

²⁷ La sa ki SENYER in deklare: Pei antye in ganny devaste; me mon pa pou detri li konpletman.

²⁸ Pour sa rezon, later pou an dey. Lesyel pou vin nwanr. Annefe, mon'n dir e mon'n deside, mon pa regret nanryen, mon pa pou retourn annaryer.

²⁹ Devan tapaz ki bann kavalye ek bann tirer fles pe fer, bann zabitan pou kit lavil e sove an tayan. En bann pou al kasyet dan lafore, lezot pou al kasyet dan kavern ros. Tou bann lavil pou ganny abandonnen, personn pa pou vin reste la ankor.

³⁰ Zerizalenm! Ou pe al ganny detri. Akfer ou'n met ou pli zoli rob rouz? Akfer ou'n met ou bann bizou annor? Akfer ou'n penn ou lizye pou fer ou zoli? Me tousala pa servi dan nanryen; ou bann lanmoure in rezet ou e zot oule touy ou.

³¹ Annefe, mon'n antann kriye konmsi en manman ti pe ganny son premye baba. Sa ti Zerizalenm ki ti pe kriye pour esey pran respirasyon. Lanmen anler, i pe kriye: Maler i lo mwan! Zot pe vin touy mwan!