Zeremi 39 - Labib An Kreol Seselwa

Bann Babilonyen I Pran Zerizalenm

¹ Dan nevyenm lannen ki Sedesyas ti lerwa Zida dan nevyenm mwan, Naboukodonozor, lerwa Babilonn, ti vin atak Zerizalenm avek tou son bann gerye.

² Lo nevyenm zour, katriyenm mwan, onzyenm lannen ki Sedesyas ti lerwa, bann miray lavil ti degrengole.

³ Alor, tou bann o zofisye lerwa Babilonn ti antre dan lavil e zot ti vin enstal zot dan Laport Milye. Ti annan Nergal-Sareser, sef larme, Sanmgar-Nebou, Sarsekim sef bann serviter lerwa e tou lezot zofisye lerwa Babilonn.

⁴ Kan Sedesyas ek son bann gerye ti war sa ki pe pase, zot ti esey sove dan lannwit. An pasan par laport ant sa de miray, zot ti al dan zarden rwayal dan direksyon Araba.

⁵ Me bann gerye Babilonyen ti pourswiv zot e atrap Sedesyas dan laplenn pre Zeriko. Zot ti kaptir li e anmenn li Ribla dan teritwar Hamat kot lerwa Naboukodonozor. I ti pas santans kont li.

⁶ Lerwa Babilonn ti egorz bann zanfan Sedesyas devan son lizye; i ti osi fer egorz bann sef Zida, Ribla.

⁷ Apre, i ti fer krev lizye Sedesyas, fer atas li avek lasenn an bronz e fer anmenn li Babilonn.

⁸ Antretan, Bann Babilonyen ti met dife avek pale rwayal ek lakaz bann zabitan. Zot ti osi kraz miray ki protez Zerizalenm.

⁹ Finalman, Nebouzaradann sef bann gard, ti fer deport Babilonn, tou dimoun ki ti'n reste dan lavil. I ti fer deport osi popilasyon ki ti'n dezerte.

¹⁰ Me Nebouzaradann, sef bann gard, ti les dan pei, bann pov ki ti napa nanryen. I ti distribye avek zot bann plantasyon rezen ek bann kare later.

Bann Babilonyen I Larg Zeremi

¹¹ La lord ki lerwa Naboukodonozor ti'n donn Nabouzeradann, sef bann gard:

¹² Al sers Zeremi e pran byen swen avek li. Pa fer li dimal, me tret li parey i ava demann ou.

¹³ Alor, Nebouzaradann, sef bann gard, ti tonm dakor avek Nebousazbann, sef bann serviter lerwa, ek Nergal-Sareser, sef larme, e avek lezot zofisye lerwa Babilonn,

¹⁴ pour anvoy bann gerye al sers Zeremi dan kordgard pour anmenn li kot Gedalya, garson Ahikanm e pti zanfan Safann. Gedalya, pour permet Zeremi retourn se li. Konmsa, Zeremi ti al reste parmi bann zabitan.

Lespwar pour Ebed-Melek

¹⁵ Kan Zeremi ti ankor prizonnyen dan kordgard, SENYER ti koz avek li:

¹⁶ Al anmenn sa mesaz kot Ebed-Melek, sa Etyopyen: La sa ki SENYER liniver, Bondye Izrael i deklare: Parey mon ti dir, mon pe anmenn maler e non pa prosperite lo Zerizalenm. Sa pou arive devan ou.

¹⁷ Me ler sa zour maler pou arive, mon pou delivre ou. Mon pa pou les ou tonm dan lanmen sa bann dimoun ki ou per.

¹⁸ Mon pou protez ou pour ki personn pa pou kapab touy ou. Ou pou sov ou lavi akoz ou ti met ou konfyans dan mwan, SENYER i deklare.