Zeremi 37 - Labib An Kreol Seselwa

Sedesyas I Demann Zeremi Led

¹ Naboukodonozor, lerwa Babilonn, ti'n enstal Sedesyas garson Zozyas, koman lerwa dan plas Yoyakin, garson Yoyakim.

² Me ni Sedesyas, ni son bann zofisye, ni lepep, pa ti obei mesaz ki SENYER ti'n donnen par lentermedyer Zeremi.

³ Pourtan, lerwa Sedesyas ti anvoy Yeoukal, garson Selemia avek pret Sofoni, garson Maaseya, kot profet Zeremi. Zot ti dir li: Priy SENYER nou Bondye pour nou.

⁴ Zeremi pa ti'n ankor ganny met dan prizon. Alor, i ti kapab ale e vini parmi lepep.

⁵ Kan bann Babilonyen ki ti pe atak Zerizalenm ti tande ki bann gerye Faraon, lerwa Lezip ti'n travers frontyer Lezip, zot ti rekile.

⁶ Alor, SENYER, ti koz avek profet Zeremi:

⁷ La sa ki SENYER, Bondye Izrael i deklare: Ou ava dir avek lerwa Zida ki'n anvoy ou pour konsilte mwan: Bann gerye Faraon ki ti'n vin pour port ou sekour, in vire e zot pe retourn kot li, Lezip.

⁸ Bann gerye Babilonn pou retournen. Zot pou atak sa lavil ki zot pou pran e ki zot pou brile.

⁹ La sa ki SENYER i deklare: Pa les zot ganny anbete; pa krwar ki bann gerye Babilonn pou ale e zot pa pou retournen.

¹⁰ Akoz, menm si ou bat tou bann gerye Babilonyen ki pe lager kont ou; menm si i reste zis gerye blese dan zot latant, zot pou sorti e met dife dan sa lavil.

Zeremi I Ganny Met dan Prizon

¹¹ Kan larme Babilonn ti'n elwanny avek Zerizalenm akoz larme Faraon ti pe aprose,

¹² Zeremi ti oule kit Zerizalenm pour li al dan teritwar Benzamen, pour li pran posesyon son teritwar parmi son pep.

¹³ Me ler i ti ariv kot baro Benzamen, i ti tonm lo Yiriya, garson Selemia, garson Hananya ki ti zofisye ansarz bann gard. Hananya ti aret profet Zeremi. I ti dir li, “Ou pe al rann ou lekor avek bann Babilonyen.”

¹⁴ Zeremi ti reponn, “Sa i en mansonz. Mon pe al rann mon lekor avek bann Babilonyen”. Me Yiriya pa ti krwar li. I ti aret Zeremi e anmenn li kot bann zofisye.

¹⁵ Zot ti ankoler kont Zeremi; zot ti bat li e anferm li kot Zonatan, sekreter lakour, ki son lakaz ti'n ganny transformen koman en prizon.

¹⁶ Zeremi ti ganny anfermen dan en kaso souteren, kot i ti reste en bon pe letan.

¹⁷ En zour, lerwa Sedesyas ti anvoy sers Zeremi e anmenn li kot li. La, lerwa ti kestyonn li an sekre, “SENYER pa'n donn ou okenn mesaz pour mwan?” Zeremi ti reponn, “Wi, i annan.” I ti azoute, “Ou pou ganny livre dan lanmen lerwa Babilonn.”

¹⁸ Zeremi ti demann lerwa Sedesyas, “Ki krim mon'n komet kont ou, ou bann sef, oubyen ou pep, pour ki ou'n fer met mwan dan kaso?

¹⁹ Oli ou bann profet ki ti anons ou ki lerwa Babilonn pa pou atak ou, ni sa pei?

²⁰ Aprezan, mon demann ou, mon senyer lerwa, ekout mwan. Ekout sa ki mon pou demann ou: Mon sipliy ou, pa ranvoy mwan kot sekreter Zonatan. Sankwa mon pou mor.”

²¹ Alor, lerwa Sedesyas ti donn lord pour gard Zeremi dan kordgard. Tou le zour, zot ti donn li en dipen sorti dan lari bann Boulanze, ziska zour ki ti nepli annan dipen dan lavil. Konmsa ki Zeremi ti reste dan kordgard.