Zeremi 25 - Labib An Kreol Seselwa

Lennmi Sorti dan Nor

¹ Dan katriyenm lannen ki Yoyakim, garson Zozyas ti lerwa Zida, SENYER ti adres en mesaz avek Zeremi, konsernan tou bann zabitan dan Zida.

² La sa ki Zeremi ti dir avek tou bann zabitan Zida ek Zerizalenm:

³ Pandan 23 an, depi trezyenm lannen ki Zozyas, garson Amonn ti lerwa Zida ziska ozordi, SENYER in koz avek mwan, e mon'n touzour transmet zot son mesaz. Me zot pa'n oule ekoute.

⁴ SENYER pa'n zanmen arete anvoy zot son bann serviter, bann profet. Me zot pa'n oule ekoute, ni port atansyon.

⁵ I ti dir zot: Sanz zot mannyer viv e aret fer sa ki mal; konmsa, zot ava kontinyen viv dan sa pei ki SENYER in donn zot ek zot bann zanset depi touzour e pour touzour.

⁶ Pa ador e servi lezot bondye e pa fer mwan ankoler avek bann stati ki zot in fabrike. Si zot ti'n obei SENYER, i pa ti pou pini zot.

⁷ Me zot in refize ekout mwan, SENYER i deklare. Olye, zot in fer mwan ankoler avek zot bann fo bondye ki zot in fabrike. Alor, i zot prop lafot si zot ganny pini.

⁸ La sa ki SENYER liniver i deklare: Akoz ou pa'n oule ekout mwan,

⁹ mon pou anvoy tou bann zabitan sorti dan Nor avek zot sef, mon serviter, Naboukodonozor, lerwa Babilonn ki fer sa ki mon oule. Mon pou fer zot lager kont Zida, kont son bann zabitan ek tou bann nasyon vwazen. Mon pou detri sa nasyon ek son bann vwazen. Mon pou fer li vin en ta larin pour touzour, en keksoz terib e sokan ki pa pou ditou gou pour war.

¹⁰ Mon pou fer disparet tou sanson lazwa ek kontantman, tou sanson maryaz. Pou annan silans kot i moul lagrenn. Lalanp delwil pou aret kler lakaz dan fernwanr.

¹¹ Tou sa pei pou vin en larin, en landrwa devaste. Tou sa bann nasyon pou anba dominasyon lerwa Naboukodonozor pandan 70 an.

¹² Apre sa 70 an, mon pou pini zabitan Babilonn ek son bann lerwa pour zot pese, SENYER i deklare. Mon pou detri sa pei e les li an rin pour touzour.

¹³ Mon pou fer tonm lo sa pei, tou bann maler ki mon ti'n anonse kont li. Sanmenm sa ki'n ganny ekri dan sa liv e ki Zeremi ti anonse lo mon non, kont sa bann nasyon.

¹⁴ Mon pou fer bann Babilonyen peye pour sa ki zot in fer. Zot pou anba dominasyon bokou nasyon ek bann gran pwisans. Konmsa mon pou fer zot rann kont pour zot aksyon e ditor ki zot in fer.

Koman Bondye Pou Pini Bann Nasyon

¹⁵ La parol ki SENYER, Bondye Izrael ti dir mwan: Pran sa lakoup ki dan mon lanmen. I ranpli avek diven mon lakoler. Al kot tou bann nasyon kot mon pou anvoy ou e fer zot bwar.

¹⁶ Kan zot ava bwar sa diven, zot latet pou vire, zot pou sou e zot pou vin fou ler zot ava war sa masak ki mon pe anmenn lo zot.

¹⁷ Alor, mon ti pran lakoup dan lanmen SENYER. Tou nasyon kot SENYER ti anvoy mwan, mon ti fer zot bwar.

¹⁸ Mon ti konmans par Zerizalenm ek bann lavil dan Zida, avek zot lerwa ek zot zofisye. Tou sa bann lavil ti ganny transformen koman en landrwa devaste, en landrwa malediksyon; i parey ankor ozordi.

¹⁹ Apre sa, ti tour Faraon, lerwa Lezip, son bann serviter, son bann zofisye, tou son pep,

²⁰ tou bann etranze ki viv Lezip; tou bann lerwa pei Ous e tou bann lerwa pei bann Filisten: Askelonn, Gaza, Ekronn, ek bann restan Asdod;

²¹ zabitan Edonm, Moab ek Amonn;

²² tou bann lerwa Tir, Sidon, ek bann ki lot kote lanmer;

²³ zabitan Dedann, Tema, Boaz e sa bann ki raz seve ki lo zot latanp;

²⁴ bann lerwa Arabi ek popilasyon metis ki viv dan dezer;

²⁵ tou bann lerwa Zimri, Elanm ek Med;

²⁶ tou bann lerwa sorti dan Nor, pros oubyen lwen, enn apre lot, e tou bann rwayonm partou lo later, zot ti bezwen bwar dan sa lakoup. Dernyen dimoun ki ti bwar, ti lerwa Babilonn.

²⁷ Apre sa, SENYER ti dir mwan dir lepep: La sa ki SENYER liniver, Bondye Izrael i deklare: Fodre zot bwar ziska ler zot ava sou e rann tou; ziska ler zot ava nepli kapab leve, akoz zot pou ganny masakre.

²⁸ Si zot refize pran sa lakoup dan ou lanmen pour zot bwar, dir zot alor, la sa ki SENYER liniver i deklare: Fodre zot bwar.

²⁹ Annefe, mon pou konmans detri mon prop lavil kot mon non i ganny envoke. Pa krwar ki zot pa pou ganny inosante. Zot osi, zot pou ganny pini, e mon pou anvoy dezas lo tou bann zabitan lo later, SENYER liniver i deklare.

³⁰ Ou, Zeremi, al anons tou sa ki mon deklare. Ou ava dir bann pep: La sa ki SENYER liniver i deklare: Parey tapaz ki en lyon i fer, SENYER pou apel depi lao dan lesyel. I pou fer son lavwa tande dan son tanp sakre. Parey en zwazo ki atak en mouton, i pou kriy byen for kont son pep. I pou kriye parey ler zot pe kraz rezen, kont tou zabitan lo later.

³¹ Son lavwa pou rezonnen dan tou kwen later. SENYER in ouver en prose kont bann nasyon. I pou apel tou dimoun devan tribinal pour zizman. Bann malfeter pou ganny masakre, SENYER i deklare.

³² La sa ki SENYER liniver i deklare: Maler pe tonm lo nasyon apre nasyon. En gro tanpet pe leve, sorti depi dan lot kote later.

³³ Sa zour, kadav bann ki SENYER in touye pou ganny fannen depi en bout later ziska lot bout. Personn pa pou met dey. Personn pa pou ranmas zot pou al antere. Zot pou tale ater parey bann ta fimyen.

³⁴ Bann berze mon troupo! Kriy byen for. Plere! Roul zot dan lapousyer. Letan pour zot ganny masakre e pour zot kadav ganny disperse in arive. Zot pou ganny kase parey en po presye.

³⁵ Landrwa kot bann berze i al kasyet in ganny detri. Tou semen ki dirizan mon pep i kapab pran pour sove, in ganny bloke.

³⁶ Ekout bann berze ki pe kriye e pe fer konplent lo bann sef troupo. Annefe, SENYER in detri zot landrwa manze,

³⁷ bann laplenn trankil in ganny devaste.

³⁸ Parey en lyon ki kit landrwa kot i kasyet, SENYER in abandonn sa pei kot i ti pe reste. Akoz bann ravaz ki lager in fer, e vyolans lakoler SENYER, sa pei in vin en dezer.