Zeremi 20 - Labib An Kreol Seselwa

Konfrontasyon ant Zeremi ek Pasour

¹ Pret Pasour, garson Imer, sef bann gard dan tanp, ti antann Zeremi anons sa bann parol sorti kot SENYER.

² I ti kalot profet Zeremi e anmar li dan lasenn dan tanp, pre avek laport Benzamen ki parlao.

³ Lannmen bomaten, Pasour ti fer larg Zeremi ki ti dir li: SENYER pou nepli apel ou Pasour, me Magor-Misabib, savedir Laper ki partou.

⁴ Annefe, la sa ki SENYER i deklare: Mon pou fer ou ek ou bann zanmi per zot lonbraz. Avek ou prop lizye, ou pou war lennmi masakre zot tou. Mon pou osi livre Zida anba pouvwar lerwa Babilonn ki pou anvoy zot annegzil Babilonn, kot zot ava ganny masakre.

⁵ Mon pou osi les zot lennmi pran e fer piyaz tou larises sa lavil e sezi tou sa ki zot in gannyen afors travay, zot bann lobze presye, menm trezor bann lerwa Zida. Tousala, lennmi pou pran e anmenn avek li Babilonn.

⁶ Kanta ou, Pasour, ou pou ganny kaptire e ganny anvoye Babilonn avek tou ou fanmir. Ou pou mor e ganny antere laba avek tou ou bann zanmi avek ki ou'n anons mansonz.

Zeremi I Plennyen avek Bondye

⁷ SENYER! Ou'n tronp mwan e mon'n les mwan ganny tronpe. Ou pli for ki mwan e ou'n pran mwan par lafors. Tou le zour, dimoun i riy mwan, e monk mwan.

⁸ Sak fwa ki mon bezwen koze, fodre ki mon kriye pour anonse: Vyolans ek destriksyon. SENYER! Akoz mon proklanm ou mesaz, dimoun i ensilte mwan e monk mwan.

⁹ Si mon dir dan mwan menm: Mon ava oubliy SENYER, e mon pou nepli koz lo son non, ou parol i vin parey en dife ki brile dan mwan. Mon esey tou pour reziste, me mon pa kapab.

¹⁰ Mon antann dimoun pe dir: Laterer i par tou kote! Denons li! Annou denons li! Tou mon bann zanmi pe espere war mwan tonbe. Zot dir: Si nou esey zwe en trik lo li, alor nou ava pli for ki li e nou ava pran nou revanz lo li.

¹¹ Me SENYER i avek mwan; e i konbat pour mwan avek pwisans. Sa bann ki fer mwan dimal pou tonbe, zot pa pou kapab fer nanryen kont mwan. Zot pou ganny kouver avek laont, akoz zot pa pou kapab reisi kont mwan. Personn pa pou oubliye koman zot ti ganny dezonore pour touzour.

¹² SENYER liniver! Ou teste bann ki fidel anver ou. Ou teste zot leker ek zot lespri. Mon'n plas mon problenm dan ou lanmen. Fer mwan war ou vanzans lo zot, akoz mon'n konfye mon problenm i dan ou lanmen.

¹³ Annou sant pour SENYER! Annou selebre SENYER! In delivre bann pov dan lanmen bann malfeter.

¹⁴ Modi sa zour ki mon ti ne! Oubliy sa zour ki mon manman ti met mwan o monn!

¹⁵ Modi sa zonm ki ti al anons mon papa: Ou'n ganny en garson!

¹⁶ I ava vin parey bann lavil ki SENYER ti detri san pitye. I ava antann plennyen bomaten e tronpet sonnen midi.

¹⁷ Si selman Bondye ti'n les mwan mor dan vant mon manman! Alor, lekor mon manman ti ava'n vin mon latonm. I ti ava'n gard mwan dan son vant pour touzour!

¹⁸ Akfer mon ti sorti dan vant mon manman si ti zis pour konn latristes ek soufrans e fini mon lavi dan laont?