Zeremi 18 - Labib An Kreol Seselwa

Zeremi I Al kot en Potye

¹ La parol ki SENYER ti dir mwan:

² Leve! Al toudswit kot potye. La, mon ava fer ou antann mon parol.

³ Alor mon ti desann kot potye. I ti pe travay lo son tour.

⁴ Parey i arive avek larzil ki i pe travay avek, sa po ki i ti pe tournen ti rate. Alor, i ti rekonmans en lot ki i ti krwar i bon.

⁵ La sa ki SENYER ti dir mwan:

⁶ Eski mon napa drwa fer avek pep Izrael, parey sa ki sa potye pe fer avek larzil? Zot dan mon lanmen parey larzil i dan lanmen sa potye.

⁷ Parfwa kan mon pe koz lo en nasyon oubyen en rwayonm, mon dir ki mon pou arase, ranverse, detri.

⁸ Me si sa nasyon i repanti e sanz son mannyer viv, mwan osi mon pa pou egzekit sa ki mon ti'n deside pou fer.

⁹ Parfwa, mon dir ki mon pou rekonstri e replant en nasyon oubyen en rwayonm.

¹⁰ Me si sa nasyon i dezobei mwan e i pa ekout mwan, alor, mon pou sanz mon lide lo dibyen ki mon ti pou al fer.

¹¹ Aprezan, al dir pep Zida e bann zabitan Zerizalenm ki mon pe mazin en maler pour zot, ki mon pe fer en plan kont zot. Sakenn i devre sorti dan son move lavi; sanz son mannyer viv ek son mannyer fer.

¹² Zot pou reponn: Akfer nou bezwen sanze? Nou pou fer sa ki nou'n deside; nou pou swiv nou bann move lentansyon.

Lepep I Rezet Senyer

¹³ La sa ki SENYER i deklare: Alor, demann bann nasyon etranze si zot in deza tande ki en nasyon in azir parey Izrael.

¹⁴ Eski lannez i arete kouver latet bann montanny dan Liban? Eski delo larivyer ki sorti dan montanny i aret koule?

¹⁵ Me mon pep in oubliy mwan e in al bril lansan devan bann fo bondye ki'n fer li tonbe dan semen, lo semen ki zot ti swiv dan tan lontan e al mars dan bann nouvo santye ki pa ankor trase.

¹⁶ Zot in telman devaste pei, ki tou dimoun ki pas par la i soke e sekwe latet.

¹⁷ Parey divan ki sorti dan Les, e ki balye tou lo son pasaz, mon pou dispers zot devan son lennmi. Zour maler pou arive, mon pou tourn mon ledo avek zot; mon pa pou tourn ver zot.

Konplo kont Zeremi

¹⁸ Alor serten parmi lepep ti dir: Annou prepar en konplo kont Zeremi! Nou pou touzour annan pret pour ansenny nou lalwa, bann saz pour donn nou konsey, profet pour proklanm mesaz Bondye. Annou par dir dimal lo li; annou aret ekout sa ki i dir.

¹⁹ Alor mon ti priye: SENYER, ekout mwan! Ekout sa ki mon lennmi pe dir kont mwan.

²⁰ Eski dimoun i rann lemal pour lebyen? Zot in fouy en trou pour fer mwan tonbe. Rapel kan mon ti koz avek ou dan zot faver, pour ki ou pa vin ankoler kont zot.

²¹ Alor, les zot bann zanfan mor lafen; fer zot ganny touye dan lager. Pa les zot bann fanm ganny ankor zanfan e ki zot vin vev. Fer ki zot mari i mor avek en lepidemi; e bann zennzan i ganny touye dan lager.

²² Anvoy bann gerye pour detri zot lakaz, pour ki zot ava kriye dan douler. Zot in fouy en trou pour mwan tonm ladan; zot in kasyet bann latrap pour pran mwan par lipye.

²³ SENYER! Ou konn byen tou zot bann konplo pour touy mwan. Pa oubliy zot krim; pa pardonn zot pese. Fer zot tonbe devan ou. Pa les zot sape devan ou lakoler.