Zeremi 16 - Labib An Kreol Seselwa

Senyer I dir Zeremi koman I Devre Viv

¹ La sa ki SENYER ti dir mwan,

² “Ou pa devre marye, ni fer zanfan dan sa pei.

³ Annefe, la sa ki mwan SENYER, mon deklare lo sa ki pou arive avek bann zanfan ki'n ne dan sa pei, e avek zot paran:

⁴ Zot pou mor avek en bann maladi grav. Personn pa pou pler zot lanmor, ni anter zot. Zot kadav pou ganny met an ta parey fimyen. Zot pou ganny masakre, oubyen zot pou mor lafen. Zwazo ek zannimo sovaz pou manz zot kadav.”

⁵ Annefe, la sa ki SENYER i deklare: Pa antre dan okenn lakaz kot i annan en lanmor; pa asiste okenn lanterman, akoz mon'n aret beni mon pep, e mon nepli montre mon labonte ek mon lafeksyon anver li, SENYER i deklare.

⁶ Ris koman pov, pou mor dan sa pei. Personn pou anter zot oubyen met dey. Personn pa pou sizle son lapo, ni raz son latet pour montre son lapenn.

⁷ Personn pa pou ofer manze dimoun ki an dey, ni rekonfort li dan son lapenn. Personn pa pou donn zot keksoz pour bwar, menm si i zot papa oubyen zot manman ki'n mor.

⁸ Pa osi antre dan en lakaz kot dimoun pe fete. Pa asiz avek zot pour ou manze e bwar.

⁹ Annefe, la sa ki SENYER liniver, Bondye Izrael i deklare: Mon pou fer aret lafet; tou tapaz rezouisans ek sanson pour nouvo ek nouvel marye. Tousala pou ariv devan zot lizye, letan zot ankor vivan, e anba ou lizye.

¹⁰ Kan ou pou dir sa pep tousala, zot pou demann ou akoz SENYER nou Bondye in deside anvoy tou sa bann gran maler lo nou. Ki krim nou'n komet? Ki pese nou'n fer.

¹¹ Alor ou ava dir zot, la sa ki SENYER i deklare: Sa i akoz zot bann zanset in abandonn mwan pour zot al ador e servi bann fo bondye. Zot in abandonn mwan e zot pa'n obei mon komannman.

¹² Me zot, zot in fer pli pir ki zot zanset: Zot tou, zot kontinyen reste dan lantetman e zot pa oule ekout sa ki mon dir zot.

¹³ Pour sa rezon, mon pou sas zot dan sa pei; mon pou anvoy zot dan en pei ki ni zot zanset, ni zot menm zot pa konnen. Laba, zot ava ador bann fo bondye, lannwit koman lizour, e mon pa pou montre zot mon labonte.

Lepep Pou Retournen Sorti Annegzil

¹⁴ La sa ki SENYER i deklare: Lontan, kan zot ti fer serman, zot ti dir: Mon promet lo non SENYER ki vivan, ki'n fer pep Izrael sorti Lezip. Me sa zour pe vini kan zot pou dir:

¹⁵ Mon promet lo non SENYER ki vivan, ki'n fer pep Izrael sorti dan pei Nor e dan lezot pei kot in dispers zot. Wi, mwan, mon pou fer zot retourn lo later ki mon ti'n donn zot zanset.

Bann Koupab Pou Ganny Pini

¹⁶ La sa ki SENYER i deklare: Mon pe anvoy en kantite peser ki pou lepidemi zot. Apre sa, mon pou anvoy en kantite saser ki pou debiste zot dan montanny, dan kolin e dan bann kap ros.

¹⁷ Mon war byen tou sa ki zot fer. Nanryen pa sap mwan; i kler ki zot koupab.

¹⁸ Me avan sa, mon pou fer zot pey doub pour zot move mannyer fer e pour zot pese, akoz zot in sali mon pei avek zot bann zidol degoutan. Zot in ranpli mon landrwa avek zot bann fo zidol.

Zeremi I Met Son Konfyans dan Senyer

¹⁹ Ou menm, SENYER, ki mon lafors, mon refiz dan langwas. Par tou kote lo later, bann nasyon pou vin dir ou: Nou bann zanset in erit zis mansonz; bann fo bondye ki pa ti kapab fer nanryen.

²⁰ Eski zonm i kapab fer son bann bondye, alor ki li menm i pa en vre bondye?

²¹ Pour sa rezon, mon pou fer sa bann nasyon konn mon pouvwar ek mon pwisans. Konmsa, zot ava konnen ki mon non i SENYER.