Zeremi 13 - Labib An Kreol Seselwa

Senyer I Fer Konn Son Plan kont Zida

¹ La sa ki SENYER ti dir mwan, “Al aste en sang latwal. Atas li otour ou leren, me pa lav li.”

² Alor, mon ti al aste en sang latwal, parey SENYER ti'n dir mwan e mon ti met li otour mon leren.

³ SENYER ti koz ankor avek mwan,

⁴ “Pran sa sang ki ou'n aste e ki ou'n met otour ou leren, e al ziska larivyer Perat. La, ou ava kasyet li dan en trou ros.”

⁵ Alor mon ti ale e mon ti fer sa ki SENYER ti'n dir mwan.

⁶ En bon pe letan apre, SENYER ti dir mwan, “Retourn kot larivyer Perat e pran sa sang ki mon ti demann ou kasyet.”

⁷ Alor mon ti retourn kot larivyer Perat. Kan mon ti revwar sa plas kot mon ti'n kasyet sa sang, mon ti war ki i ti'n pouri e i ti nepli bon pour nanryen.

⁸ SENYER ti ankor koz avek mwan,

⁹ La sa ki SENYER i deklare: Mon pou detri larogans Zida e gran lorgey Zerizalenm.

¹⁰ Zot en pep rebel ki refize obei mwan. Dan zot lantetman, zot in kontinyen swiv zot prop dezir; zot in kontinyen ador e servi lezot bondye. Alor, zot pou vin parey sa sang ki nepli bon pour nanryen.

¹¹ Annefe, SENYER i deklare, parey en zonm i ser en sang otour son leren, mon ti'n atas rwayonm Zida ek rwayonm Izrael otour mwan. Mon ti fer sa pour ki zot vin mon pep, en size loner e laglwar pour mwan. Me zot pa'n oule obei mwan.

Lepep I parey En Karaf Diven

¹² La parol ki ou ava dir zot: La sa ki SENYER, Bondye Izrael i deklare: Tou bann barik i servi pour ranpli avek diven. Zot pou dir ou: Byen sir nou konnen ki barik i la pour met diven ladan.

¹³ Alor ou ava dir zot: La sa ki SENYER i deklare: Mon pou soul tou bann zabitan sa pei, ansanm avek bann lerwa ki asiz lo tronn David: Pret, profet ek zabitan Zerizalenm.

¹⁴ Mon pou bat zot latet ansanm, papa kont zanfan, SENYER i deklare. Personn pa pou ganny eparnyen. Mon pa pou annan okenn bonte, okenn pitye, okenn konpasyon. Personn pa pou anpes mwan detri zot.

Zeremi I Donn Lepep en Dernyen Lavertisman

¹⁵ Pep Izrael! Ekout sa ki SENYER i deklare: Aret fer vantar.

¹⁶ Rann glwar SENYER ou Bondye avan ki i anvoy fernwanr, avan ki ou tap ou lipye kont en ros dan montanny. Ou ti pe esper lalimyer, me plito fernwanr ek nyaz sonm ki vini.

¹⁷ Si, akoz ou vantardiz, ou pa ekoute, mon pour al asiz dan mon kwen. Mon pou al pler bokou, akoz troupo SENYER pe ganny deporte.

Senyer I Koz avek Fanmir Rwayal

¹⁸ Al dir lerwa ek son manman: Sorti lo tronn, akoz ou zoli kouronn in tonbe.

¹⁹ Bann lavil dan Sid Zida in fermen. Personn pa kapab antre. Tou bann zabitan dan Zida pe ganny deporte.

Zerizalenm In Perdi Son Loner

²⁰ Zerizalenm! Lev ou lizye, gete: Ou bann lennmi pe vini sorti dan Nor! Oli sa troupo ki mon'n konfye ou? Oli sa bann mouton ki ti fer ou fyer?

²¹ I annan dimoun ki ou'n fer zanmi avek. Ki ou pou dir kan zot ava azir kont ou e domin ou? Douler pou pran ou parey en fanm ki dan douler lanfantman.

²² Si ou demann ou lekor: Akoz tousala in arive ou? Akoz sa kantite fot ki ou'n fer kan ou rob ti ganny desire e ou ti ganny vyole.

²³ Eski en dimoun nwanr i kapab sanz kouler son lapo? Eski en leopar i kapab tir bann tas lo li? Ou, ki abitye fer lemal, ou pou kapab fer sa ki byen?

²⁴ SENYER pou dispers ou parey bren lapay ki divan sorti dan dezer i fer anvole.

²⁵ Sanmenm sa ou sor, SENYER i deklare. Sanmenm sa ki i'n deside pour fer avek ou, akoz ou'n oubliy li e ou'n al fer konfyans dan mansonz.

²⁶ Mwan osi, mon pou lev ou rob lo ou figir e tou dimoun ava war ou touni.

²⁷ SENYER in war ou komet adilter; in tann ou bann tapaz kontantman. In war ou al kot bann fo bondye lo bann montanny e dan laplenn. Malerezman pour ou, Zerizalenm! Ou pa oule swiv mwan pour ou ganny pirifye. Ankor konbyen letan sa sityasyon i kapab dire?