Zenez 5 - Labib An Kreol Seselwa

Desandans Adan ziska Noe

¹ Sa lalis bann desandan Adan: Kan Bondye ti kree bann imen, i ti fer zot dan resanblans Bondye.

² Bondye ti kree zot zonm ek fanm. Zour i ti kree zot, Bondye ti beni zot e apel zot imen.

³ Kan Adan ti annan 130 an, i ti ganny en garson ki ti vreman resanble li. I ti apel li Set.

⁴ Apre nesans Set, Adan ti viv ankor 800 an e i ti ganny ankor lezot garson ek fiy.

⁵ Adan ti viv an tou 930 an e apre i ti mor.

⁶ Set ti annan 105 an ler i ti ganny en garson, Enos.

⁷ Apre nesans Enos, Set ti viv ankor 800 an e i ti ganny ankor lezot garson ek fiy.

⁸ Set ti viv an tou 912 an e apre i ti mor.

⁹ Enos ti annan 90 an kan i ti ganny Kenann.

¹⁰ Apre nesans Kenann, Enos ti viv ankor 815 an e i ti ganny ankor lezot garson ek fiy.

¹¹ Enos ti viv an tou 905 an e apre i ti mor.

¹² Kenann ti annan 70 an kan i ti ganny en garson, Mahalaleel.

¹³ Apre nesans Mahalaleel, Kenann ti viv ankor 840 an e i ti ganny ankor lezot garson ek fiy.

¹⁴ Kenann ti viv an tou 910 an e apre i ti mor.

¹⁵ Mahalaleel ti annan 65 an ler i ti ganny en garson, Yered.

¹⁶ Apre nesans Yered, Mahalaleel ti viv ankor 830 an e i ti ganny ankor lezot garson ek fiy.

¹⁷ Mahalaleel ti viv an tou 895 an e apre i ti mor.

¹⁸ A laz 162 an Yered ti ganny en garson, Henok.

¹⁹ Apre nesans Henok, Yered ti viv ankor 800 an e i ti ganny lezot garson ek fiy.

²⁰ Yered ti viv an tou 962 an e apre i ti mor.

²¹ Henok ti annan 65 an ler i ti ganny en garson, Matousalenm.

²² Apre nesans Matousalenm, Henok ti viv e mars avek Bondye ankor 300 an. I ti ganny ankor lezot garson ek fiy.

²³ Henok ti viv an tou 365 an.

²⁴ I ti mars avek Bondye tou son lavi e apre i ti disparet, akoz Bondye ti pran li.

²⁵ Matousalenm ti annan 187 an ler i ti ganny en garson, Lemek.

²⁶ Apre nesans Lemek, Matousalenm ti viv ankor 782 an e i ti ganny ankor lezot garson ek fiy.

²⁷ Matousalenm ti viv an tou 969 an e apre i ti mor.

²⁸ Lemek ti annan 182 an ler i ti ganny en garson.

²⁹ I ti apel li Noe. I ti dir: I pou en konsolasyon pour nou dan nou travay ek fatig lo sa later modi.

³⁰ Apre nesans Noe, Lemek ti viv ankor 585 an. I ti ganny lezot garson ek fiy.

³¹ Lemek ti viv an tou 777 an, apre, i ti mor.

³² Noe ti annan 500 an ler i ti ganny trwa garson, Senm, Kanm ek Zafet.