Zenez 40 - Labib An Kreol Seselwa

Zozef I Enterpret Rev de Prizonnyen

¹ Apre en pe letan, de sef dan lakour Faraon, responsab labwason ek son sef patisye, ti'n komet en fot kont lerwa Lezip.

² Faraon ti ankoler kont sa de fonksyonner enportan.

³ I ti fer met zot dan prizon kot son sef gard, sa menm prizon kot Zozef ti ete.

⁴ Sef gard ti met Zozef responsab pour servi zot. Zot ti reste dan prizon pandan en serten letan.

⁵ En menm swar, tou le de, responsab labwason lerwa ek sef patisye ti ganny sakenn en rev ki ti annan sinifikasyon spesyal.

⁶ Kan Zozef ti vin war zot bomaten, i ti remarke ki zot ti byen trakase.

⁷ I ti demann zot, “Akoz zot figir i paret tris ozordi?”

⁸ Zot ti dir li, “Nou'n ganny en rev, e napa personn ki kapab donn nou en lenterpretasyon.” Zozef ti dir zot, “Pa Bondye ki donn lenterpretasyon rev? Pa per! Rakont mwan zot rev.”

⁹ Responsab labwason lerwa ti rakont son rev avek Zozef, “Mon ti reve ti annan en pye rezen devan mwan.

¹⁰ I ti annan trwa brans. Sa pye rezen ti bourzonnen e fleri. Bann fler ti ouver e donn bann grap rezen.

¹¹ Lakoup Faraon ti dan mon lanmen. Mon ti pran bann grap rezen e mon ti pers zot dan lakoup e donn Faraon.”

¹² Zozef ti dir li, “La lenterpretasyon ou rev: Sa trwa brans i reprezant trwa zour.

¹³ Dan ankor trwa zour, Faraon pou retabli ou dan ou responsabilite. Ou ava repran ou travay, e servi Faraon son lakoup parey avan.

¹⁴ Mazin mwan kan ou pou dan byen. Mon demann ou mansyonn mwan; ganny labonte koz avek Faraon pour mwan e fer mwan sorti dan sa prizon.

¹⁵ Annefe, mon ti ganny anmennen pardfors sorti dan pei bann Ebre, e isi osi, mon pa'n fer nanryen mal pour merit ganny met dan prizon.”

¹⁶ Ler sef patisye ti war ki lenterpretasyon rev responsab labwason lerwa ti bon, i ti dir Zozef, “Mwan osi mon ti ganny en rev: Ti annan trwa pannyen gato lo mon latet.

¹⁷ Dan pannyen anler ti annan tou kalite dipen ek gato pour Faraon, e bann zwazo ti pe bek gato dan pannyen lo mon latet.”

¹⁸ Zozef ti reponn, “La son lenterpretasyon: Sa trwa pannyen i reprezant trwa zour.

¹⁹ Dan trwa zour, Faraon pou fer pann ou dan en pye dibwa, e zwazo pou vin bek ou laser.”

²⁰ Trwa zour plitar, Faraon ti ganny son lanniverser. Ti annan en gran lafet pour tou son bann serviter. Faraon ti fer sorti responsab labwason ek sef patisye dan prizon.

²¹ Responsab labwason ti ganny retabli dan son travay pour met lakoup dan lanmen Faraon.

²² Me Faraon ti fer pann sef patisye, parey lenterpretasyon ki Zozef ti'n donnen.

²³ Pourtan, responsab labwason lerwa ti oubliy koz lo Zozef.