Zenez 38 - Labib An Kreol Seselwa

Zida ek Tamar

¹ Dan sa letan, Zida ti kit son bann frer e al reste Adoulanm kot en zonm ki ti apel Hira.

² La, Zida ti zwenn fiy en serten Kananeen, ki ti apel Soua. I ti marye e dormi avek li.

³ Son fanm ti tonm ansent e i ti ganny en garson ki i ti apel Er.

⁴ I ti tonm ansent ankor e ganny en lot garson ki i ti apel Onann.

⁵ I ti ganny ankor en garson ki i ti apel Sela. Zida ti'n al Kezib kan Sela ti ne.

⁶ Zida ti swazir en fanm pour Er, son lene garson. Sa fanm ti apel Tamar.

⁷ Me Er, lene garson Zida, ti fer sa ki pa ti fer plezir SENYER, e SENYER ti pran son lavi.

⁸ Zida ti dir Onann, “Al kot fanm ou frer, fer devwar en bofrer anver son fanm e donn ou frer en desandans.”

⁹ Me Onann ti konnen ki sa desandans pa ti pou vin pour li. Alor, ler i ti al dormi avek fanm son frer, i ti zet deor, pour li pa donn son frer okenn desandans.

¹⁰ SENYER pa ti kontan sa ki i ti fer, e i ti pran son lavi.

¹¹ Alor, Zida ti dir avek Tamar, son belfiy, “Ou en vev, al reste dan lakaz ou papa, ziska ki Sela mon garson i gran.” Annefe, i ti pe dir dan li menm: Fodre pa ki mon garson Sela i mor, parey son de frer. Alor, Tamar ti al reste kot son papa.

¹² En bon pe letan ti'n pase e fanm Zida, fiy Soua ti mor. Ler Zida ti'n ganny konsole, i ti al Timna kot bann zonm ki ti pe koup lalenn son bann mouton, avek son zanmi Hira, en Adoulamit.

¹³ Tamar ti ganny nouvel ki son boper pe mont Timna pour al koup lalenn mouton.

¹⁴ I ti tir son lenz vev, kouver son figir avek en vwal, e al asiz dan lantre Enaim ki lo semen Timna. I ti'n remarke ki Sela ti'n gran, me i pa ti ankor marye avek li.

¹⁵ Kan Zida ti war li, i ti krwar ki i ti en prostitye, akoz i ti'n kouver son figir.

¹⁶ I ti apros li e dir li, “Les mwan dormi avek ou.” I pa ti konnen ki sa ti son belfiy. I ti demann li, “Ki ou pou donn mwan pour ou dormi avek mwan?”

¹⁷ I ti reponn, “Mon ava donn ou en zenn kabri ki sorti dan mon troupo.” I ti dir li, “Donn mwan en lobze koman garanti ziska ki ou anvoy li.”

¹⁸ Zida ti dir li, “Ki lobze garanti mon kapab donn ou?” I ti reponn, “Donn mwan ou sele avek son kordon ek sa baton ki dan ou lanmen.” Alor i ti donn li tousala e dormi avek li. Tamar ti tonm ansent.

¹⁹ Tamar ti ale. I ti retir son vwal e remet son lenz vev.

²⁰ Zida ti anvoy son zanmi, en Adoulamit, anmenn sa zenn kabri pour repran son bann lobze garanti avek sa fanm; me i pa ti trouv li.

²¹ I ti demann bann zonm dan sa landrwa, “Oli sa prostitye ki asiz obor semen Enaim?” Zot ti reponn, “Pa'n zanmen annan prostitye isi.”

²² Alor i ti retourn kot Zida e dir li, “Mon pa'n trouv li, e bann zonm laba i dir ki napa prostitye isi.”

²³ Zida ti reponn, “Les li gard sa bann keksoz pour li. Fodre pa ki nou rann nou ridikil. Mon'n anvoy li sa zenn kabri e ou pa'n kapab trouv li.”

²⁴ Anviron trwa mwan plitar, Zida ti ganny dir, “Tamar ou belfiy, in vin en prostitye e i ansent.” Zida ti dir, “Anmenn li isi e i ava ganny brile.”

²⁵ Letan zot ti pe anmenn li, i ti fer dir son boper, “Mon ansent pour sa zonm ki propriyeter sa bann lobze.” Tamar ti dir, “Dir mwan pour ki sa bann lobze: Sa sele, sa bann kordon ek sa baton?”

²⁶ Zida ti rekonnet sa bann lobze e i ti dir, “I annan plis respe pour lalwa ki mwan; mon pa'n donn li mon garson, Sela.” Zida pa ti ganny ankor relasyon avek li.

²⁷ Kan son letan lakousman ti arive, Tamar ti ganny de zanfan zimo.

²⁸ Pandan lakousman, enn ti met son lanmen deor. Sazfanm ti anmar en difil rouz avek son lanmen. I ti dir, “Sa enn in sorti premye.”

²⁹ Me, baba ti tir son lanmen e son frer ti sorti. Sa sazfanm ti dir, “Konmsa ki ou fer ou prepar ou pasaz!” Alor i ti apel li Perets, savedir prepar ou pasaz.

³⁰ Apre, son frer ki ti annan sa difil mov lo son lebra, ti sorti. I ti ganny apele Zera, savedir, klate.