Zenez 37 - Labib An Kreol Seselwa

Zozef ek Son Bann Frer

¹ Zakob ti pe reste dan Kanaan, dan pei kot son papa ti'n reste koman en etranze.

² La zistwar fanmir Zakob: Zozef ti annan 17 an, i ti pe vey troupo avek son bann frer. I ti avek bann garson Bila e Zilpa, bann fanm son papa. Zozef ti raport tou sa ki zot fer mal avek zot papa.

³ Izrael ti kontan Zozef plis ki tou son bann zanfan, akoz i ti ne dan son vye zour. I ti koud en gran rob lanmans long pour li.

⁴ Kan son bann frer ti remarke ki zot papa ti kontan Zozef plis ki zot, zot ti ay li; zot pa ti kapab koz byen avek li.

⁵ En zour, Zozef ti ganny en rev, e kan i ti rakont son bann frer sa rev, zot ti deteste li plis ankor.

⁶ I ti dir zot, “Ekout mon rev:

⁷ Nou ti pe anmar pake dible dan plantasyon, e mon pake ti lev drwat debout. Me zot pake ti rasanble otour sa ki pour mwan e tonm ater devan li.”

⁸ Son bann frer ti dir li, “Eski ou pou vreman vin nou lerwa? Oubyen, eski vreman ou pou annan dominasyon lo nou?” Zot ti deteste li plis ankor akoz son bann rev e mannyer i ti rakont zot.

⁹ Zozef ti ganny en lot rev ki i ti rakont son bann frer, “Mon'n ganny en lot rev: Soley, lalin ek 11 zetwal ti pe prosternen devan mwan.”

¹⁰ Kan i ti rakont sa rev avek son papa e son bann frer, son papa ti reprimann li. I ti dir li, “Ki sa kalite rev ki ou'n fer? Eski mwan avek ou manman ek ou bann frer, nou pou prosternen devan ou?”

¹¹ Son bann frer ti zalou li, me son papa ti gard sa rev dan son lespri.

Zozef I Ganny Vann

¹² Son bann frer ti anmenn bann troupo manz zerb Sikenm.

¹³ Izrael ti dir Zozef, “Eski ou bann frer pa'n anmenn bann troupo Sikenm? Mon pou anvoy ou kot zot.” Zozef ti reponn, “La mon la.”

¹⁴ Alor i ti dir, “Al gete si ou bann frer i byen avek troupo, e retourn kot mwan.” Alor, i ti anvoy li dan vale Hebron. Zozef ti kit Hebron e i ti al Sikenm.

¹⁵ En zonm ti trouv li pe marse dan lafore e demann li, “Lekel ki ou pe rode?”

¹⁶ I ti reponn, “Mon pe rod mon bann frer. Eski ou konnen kote zot ete?”

¹⁷ Sa zonm ti reponn, “Zot in al lwen, akoz mon ti antann zot dir: Annou al Dotan.” Alor, Zozef ti al rod son bann frer e i ti trouv zot Dotan.

¹⁸ Zot ti war li depi lwen e avan ki i ariv obor zot, zot ti fer plan pour touy li.

¹⁹ Zot ti dir kanmarad, “La sa rever pe vini.

²⁰ Annou touy li e zet son lekor dan enn bann pwi. Nou ava dir ki en zannimo sovaz in touy li. Nou ava war ki pou arive avek son bann rev.”

²¹ Kan Riben ti antann sa, i ti esey sov li an dizan, “Pa bezwen pran son lavi.”

²² Riben ti dir zot, “Pa bezwen vers disan. Zet li dan enn sa bann pwi, me pa bezwen fer li ditor.” I ti dir sa pour li delivre Zozef e retourn li kot son papa.

²³ Kan Zozef ti ariv kot zot, zot ti tir son rob, sa rob lanmans long ki i ti'n mete,

²⁴ e zot ti zet li dan en pwi. Sa pwi ti sek. Ti napa delo ladan.

²⁵ Answit, zot ti asize pour manze. Zot ti war en karavann bann Ismaelit sorti Galaad, zot bann samo ti pe anmenn parfen, lagonm ek lamir, ki zot ti pe anmenn Lezip.

²⁶ Zida ti dir son bann frer, “Ki benefis nou pou gannyen pour touy nou frer, e kasyet son disan?

²⁷ Annou vann li avek bann Ismaelit e annou pa sali nou lanmen avek son disan. Apre tou, i nou prop laser.” Son bann frer ti ekout li.

²⁸ En bann marsan Madyanit ti pas par la. Zot ti tir Zozef dan sa pwi e zot ti vann li avek sa bann Ismaelit pour 20 pyes larzan. Sa bann marsan ti anmenn Zozef Lezip.

²⁹ Kan Riben ti retourn kot pwi, i pa ti war Zozef. Alor, i ti desir son lenz

³⁰ e retourn kot son bann frer. I ti dir, “Zozef pa la. Kote mon pou ale aprezan?”

³¹ Alor, zot ti touy en kabri e tranp rob Zozef dan son disan.

³² Zot ti anvoy sa rob kot zot papa. Zot ti fer dir li, “Sanmenm ki nou'n trouve. Gete si sa i vreman rob ou garson oubyen non.”

³³ Zozef ti rekonnet sa rob. I ti dir, “Sa rob mon garson. En zannimo sovaz i'n devor li. Zozef san dout in ganny desire.”

³⁴ Zakob ti desir son lenz e i ti met en sak dan son leren. I ti pler son garson pandan plizyer zour.

³⁵ Tou son bann garson ek son bann fiy ti vin konsol li. Me i ti refiz tou konsolasyon. I ti dir, “Dan dey ki mon pou al kot mon garson, dan lemonn lanmor.” Zakob pa ti arete plere.

³⁶ Alor, bann Madyanit ti'n vann Zozef Lezip avek Potifar, en sef e kaptenn gard rwayal dan lakour Faraon.