Zenez 31 - Labib An Kreol Seselwa

Zakob I Sove kot Laban

¹ Zakob ti antann konversasyon bann garson Laban. Zot ti pe dir: Zakob in pran tou sa ki pour nou papa. Se avek byen nou papa ki i'n ganny tou son larises.

² Zakob ti remarke ki latitid Laban anver li, ti nepli parey avan.

³ Alor, SENYER ti dir Zakob, “Retourn dan pei ou zanset, dan pei kot ou sorti e mon ava avek ou.”

⁴ Zakob ti fer apel Rasel ek Lea ki ti dan lakanpanny avek bann troupo mouton.

⁵ I ti dir zot: Mon remarke ki zot papa napa menm lestim pour mwan parey avan. Me Bondye mon papa in avek mwan.

⁶ Zot konnen zot menm ki mon'n servi zot papa avek tou mon lafors.

⁷ Me zot papa in esey tronp mwan e in sanz mon lapey dis fwa, me Bondye pa'n permet li fer mwan dimal.

⁸ Sak fwa ki i ti dir: Bann zannimo pitakle i ou lapey, tou bann zannimo dan troupo ti ganny piti pitakle. Si i ti dir: Bann zannimo avek reye i ou lapey, tou zannimo dan troupo ti ganny piti reye.

⁹ Se dan sa fason ki Bondye in pran troupo zot papa e in donn mwan.

¹⁰ Ler bann zannimo dan troupo ti an sezon, mon ti lev lizye, e dan en rev, mon ti war ki bann mal ki ti pe akouple ti swa pitakle, oubyen reye.

¹¹ Apre, lanz SENYER ti dir mwan dan sa rev: Zakob! Mon ti reponn, “Wi! La mon la.”

¹² I ti dir, “Lev ou lizye e gete! Ou ava war ki tou bann bouk ki mont lo bann femel i pitakle. Mon'n war tou sa ki Laban pe fer ou.

¹³ Mwan menm Bondye ki ti aparet avek ou Betel, kot ou ti vers delwil lo sa ros pilye sakre e kot ou ti fer en ve anver mwan. Aprezan leve! Kit sa pei e retourn dan pei kot ou ti ne.”

¹⁴ Rasel ek Lea ti reponn li, “Nou nepli annan okenn par dan lakaz nou papa.

¹⁵ Pa i konsider nou koman bann etranze? I'n vann nou e i'n manz tou sa larzan.

¹⁶ Tou sa larises ki Bondye in pran avek nou papa i pour nou ek nou bann garson. Aprezan, fer tou sa ki Bondye in dir ou.”

¹⁷ Zakob ti leve. I ti pran son bann zanfan ek son bann fanm e met zot lo samo.

¹⁸ I ti pran tou son troupo ek tou son byen ki i'n gannyen, troupo ki i ti'n aste Padann-Aranm e i ti al kot son papa, Izaak, dan pei Kanaan.

¹⁹ Laban ti'n al koup lalenn lo son bann mouton e Rasel ti profite pour vol bann pti stati dan lakaz son papa.

²⁰ Zakob ti tronp Laban, sa Arameen. I ti sove san dir ki i ti pe ale.

²¹ I ti sove avek tou sa ki ti pour li. I ti travers larivyer e pran semen ki al dan direksyon rezyon montanny Galaad.

Laban I Pourswiv Zakob

²² Trwa zour plitar, Laban ti aprann ki Zakob ti'n sove.

²³ I ti pran son bann zonm e pourswiv li pandan set zour ziska ki i ti zwenn li dan rezyon montanny Galaad.

²⁴ Me aswar, Bondye ti aparet avek Laban, sa Arameen, dan en rev. I ti dir li: Fer atansyon ou pa dir nanryen Zakob, ni an byen ni an mal.

²⁵ Laban ti zwenn Zakob ki ti'n enstal son latant dan montanny. Laban li, avek tou son lantouraz ti al kanp Galaad.

²⁶ Laban ti dir Zakob, “Ki ou'n fer? Ou'n tronp mwan e ou'n pran mon bann fiy konmsi bann prizonnyen lager.

²⁷ Akoz ou'n sov an kasyet, e tronp mwan san dir mwan? Mon ti ava les ou ale dan lazwa ek sanson, e avek lakonpannyman lenstriman lanmizik.

²⁸ Ou pa'n ni les mwan anbras mon bann garson ek mon bann fiy, ni dir zot orevwar. Ou'n azir dan fou.

²⁹ Mon ti ava kapab fer ou dimal, me Bondye ou papa in koz avek mwan yer swar. I'n dir mwan: Atansyon, pa fer nanryen Zakob, ni an byen ni an mal.

³⁰ Menm si ou ti anvi retourn kot lakaz ou papa, akoz ou'n vol mon bann pti stati?”

³¹ Zakob ti reponn Laban, “Mon ti per. Mon ti krwar ou pou vin aras mwan ou bann fiy.

³² Me sa enn avek ki ou ava war ou bann bondye, pou perdi son lavi. Dan prezans ou bann zans, gete kwa ki pour ou e pran.” Zakob pa ti konnen ki Rasel ti'n vol sa bann bondye.

³³ Alor, Laban ti antre dan latant Zakob, dan latant Lea, e dan latant son de servant, me i pa ti trouv nanryen. I ti sorti dan latant Lea, e antre dan latant Rasel.

³⁴ Rasel ti'n kasyet sa bann pti stati anba lasel samo e i ti'n asiz lo la. Laban ti rod dan latant, me i pa ti war nanryen.

³⁵ Rasel ti dir son papa, “Pa ankoler si mon pa leve devan ou, akoz mon annan en lendispozisyon ki bann fanm i gannyen.” Alor, i ti rode, me i pa ti war son bann stati.

³⁶ Zakob ti ankoler, e repros Laban. I ti dir Laban, “Ki mon'n fer ou? Ki pese mon'n fer, ki ou'n pourswiv mwan konmsa?

³⁷ Ou'n fouy dan tou mon keksoz, eski ou'n trouv keksoz ki pour ou? Met li devan mon bann zans, e demann zot zizman ant nou de.

³⁸ Mon'n avek ou pandan 20 an, okenn ou bann kabri ek mouton pa'n avorte. Ou ti fer mwan rann kont sa ki ti ganny vole aswar koman lizour.

³⁹ Mon pa ti anmenn kot ou, okenn zannimo desire par bebet sovaz. Mon ti kouver tou fre mwan menm. Mon ti pran responsabilite, menm si i ti ganny vole aswar oubyen lizour.

⁴⁰ Lizour, mon ti soufer lasaler, e aswar lafreser. Mon pa ti ganny sonmey.

⁴¹ Mon'n fer 20 an kot ou, mon'n servi ou pandan 14 an pour ou de fiy, e 6 an pour ganny bann troupo. Ou'n sanz mon lapey 10 fwa.

⁴² Si Bondye mon papa Abrahanm, ki osi Bondye Izaak, pa ti lo mon kote, sirman ou ti pou fer mwan al lanmen vid. Bondye in war mon soufrans e travay ki mon'n fer. Yer swar in rann zizman dan mon faver.”

Zakob I Fer En Lalyans avek Laban

⁴³ Laban ti reponn Zakob, “Sa bann fiy se mon bann fiy, sa bann zanfan se mon bann zanfan, sa bann troupo se mon bann troupo, e tou sa ki ou war i pour mwan. Me ozordi ki mon kapab fer pour mon bann fiy oubyen mon bann zanfan ki zot in donn nesans?

⁴⁴ Annou fer en lalyans ant ou ek mwan. Sa lalyans ava vin en temwen ant ou ek mwan.”

⁴⁵ Zakob ti pran en ros e plas li koman en pilye sakre.

⁴⁶ I ti dir son bann zonm, “Ranmas ros.” Zot ti ranmas ros e met zot an ta; zot ti manz lo la.

⁴⁷ Laban ti apel sa landrwa Yegar-Sahadouta, me Zakob ti apel li Galeed.

⁴⁸ Laban ti dir, “Sa ta ros i en temwen ant ou ek mwan ozordi.” Pour sa rezon i ti ganny apele Galeed.

⁴⁹ I ti osi apel li Mispa, akoz i ti dir, “SENYER ava veye ant ou ek mwan, kan nou lwen e nou pa war avek kanmarad.

⁵⁰ Si ou maltret mon bann fiy, si ou pran lezot fanm, pa avek zonm ki ou annan zafer, me Bondye i temwen ant ou ek mwan.”

⁵¹ Apre, Laban ti dir Zakob, “Get sa ta ros ek sa pilye sakre ki mon'n etabli ant ou ek mwan.

⁵² Sa ta ros i en temwen e sa pilye sakre i en temwen ki mon pa pou depas li pour vin kot ou, e ni ou, ou pa pou depas sa pilye pour vin fer mwan ditor.

⁵³ Bondye Abrahanm e Bondye Nahor, ki osi Bondye zot papa, ava ziz ant ou ek mwan.” Alor, Zakob ti fer serman devan Bondye Izaak son papa.

⁵⁴ Zakob ti ofer en sakrifis lo sa montanny e i ti envit son bann zonm pour manz dipen. Zot ti pas tou lannwit lo montanny.

⁵⁵ Laban ti leve granmaten, anbras son bann pti zanfan ek son bann fiy. I ti beni zot, e i ti retourn se li.