Zenez 20 - Labib An Kreol Seselwa

Abrahanm ek Abimelek

¹ Abrahanm ti kit sa landrwa e i ti al dan direksyon dezer Negev. I ti etabli li ant Kades ek Sour. Apre en pe letan, i ti al reste Gerar.

² Abrahanm ti dir avek dimoun osize Sara, “I mon ser.” Alor, Abimelek, lerwa Gerar ti fer anmenn Sara kot li.

³ Pandan lannwit, Bondye ti aparet avek Abimelek dan en rev. I ti dir li, “Ou pou mor akoz sa fanm ki ou'n pran, i en fanm marye.”

⁴ Abimelek ki pa ti ankor dormi avek Sara, ti dir, “SENYER! Eski ou pou touy en pep inosan?

⁵ Pa Abrahanm ki'n dir: I mon ser? Pa Sara ki ti dir: I mon frer? Mon'n azir avek en leker kler e avek en lanmen inosan.”

⁶ Bondye ti reponn li dan en rev, “Wi, mon konnen ki ou'n azir avek en leker net. Pour sa rezon, mon'n anpes ou komet en pese kont mwan e mon pa'n permet ou tous li.

⁷ Aprezan, rann sa zonm son fanm, akoz i en profet. I ava priy pour ou e ou ava viv. Me si ou pa fer sa, ou pou mor, ou, avek tou ou fanmir.”

⁸ Alor, Abimelek ti leve granmaten, apel tou son bann serviter e rakont zot tou sa ki'n pase. Bann zonm ti ganny en gro lafreyer.

⁹ Apre, Abimelek ti fer apel Abrahanm. I ti dir li, “Ki ou'n fer nou? Ki mon'n fer kont ou pour ou anmenn sa malediksyon lo mwan e lo mon rwayonm? Ou pa ti devre azir konmsa anver mwan.

¹⁰ Avek ki lentansyon ou'n fer sa?”

¹¹ Abrahanm ti dir, “Mon ti krwar ki ti napa personn ki annan respe pour Bondye isi e ki zot ti pou touy mwan akoz mon fanm.

¹² Annefe, Sara i vreman mon ser, fiy mon papa, me pa menm manman, e i'n vin mon fanm.

¹³ Kan Bondye ti fer mwan sorti kot mon papa, mon ti dir Sara: Fer mwan sa faver ki dan tou landrwa kot nou ale, ou ava dir ki mwan ou frer.”

¹⁴ Abimelek ti rann li son fanm. I ti donn Abrahanm mouton, bef, serviter ek servant.

¹⁵ I ti dir li, “Mon pei i la devan ou. Enstal ou kot i fer ou plezir.”

¹⁶ Apre, i ti dir Sara, “Mon'n donn ou frer 1,000 pyes larzan. Sa i en laprev ki ou inosan dan sa zafer. Ou loner in ganny repare devan tou dimoun.”

¹⁷ Apre, Abrahanm ti priy Bondye, ki ti geri Abimelek, son fanm ek son bann servant. Alor, zot ti kapab ganny zanfan.

¹⁸ Annefe, SENYER ti'n fer tou bann fanm dan lakour Abimelek steril akoz Sara, fanm Abrahanm.