Zakari 4 - Labib An Kreol Seselwa

Senkyenm Vizyon: Bann Portlanp ek bann Pye Zoliv

¹ Lanz ki ti pe koz avek mwan ti retournen. I ti revey mwan konmsi en zonm ki sorti dan en profon sonmey.

² I ti demann mwan, “Ki ou war?” Mon ti reponn, “Mon war en portlanp annor avek en rezervwar anler. Par lao, i annan set lalanp. Lo sa set lalanp ki par lao, i annan set labek.

³ Akote sa portlanp, i annan de pye zoliv, enn lo kote drwat rezervwar, e lot lo kote gos.”

⁴ Mon ti demann avek lanz ki ti pe koz avek mwan, “Mon senyer! Ki tousala i reprezante?”

⁵ Alor, lanz ki ti pe koz avek mwan ti reponn, “Ou pa konnen ki zot reprezante?” Mon ti dir, “Non, Mon senyer.”

⁶ I ti dir mwan, “La parol SENYER pour Zorobabel: Pa par pwisans, ni par lafors, me par mon lespri, SENYER liniver ki deklare.

⁷ Ki ou ete, ou ki en gran montanny? Devan Zorobabel, ou pou vin en laplenn. I pou tir ros fondasyon pandan ki dimoun pe kriye: Bravo! Bravo!”

⁸ Apre, SENYER ti donn mwan sa mesaz,

⁹ “Lanmen Zorobabel ki'n poz fondasyon sa tanp. Se son lanmen ki pou konplet li. Alor, ou ava konnen ki SENYER liniver ki'n anvoy mwan kot ou.

¹⁰ Sa enn ki'n mepriz letan bann pti keksoz, pou kontan kan i pou war sa pyer fondasyon dan lanmen Zorobabel! Sa set lalanp se lizye SENYER ki eksplor later antye.”

¹¹ Alor, mon ti dir li, “Ki sa de pye zoliv ki lo kote gos e lo kote drwat sa portlanp i reprezante?”

¹² Mon ti demann li ankor en fwa, “Ki sa de brans bann pye zoliv ki devers delwil dore atraver de tiyo annor i reprezante?”

¹³ I ti dir mwan, “Ou pa konnen?” Mon ti reponn, “Non! Mon pa konnen, mon senyer.”

¹⁴ Alor i ti dir, “Zot reprezant sa de zonm ki'n ganny konsakre avek delwil fre. Zot pou dan servis devan Senyer later antye.”