Zakari 2 - Labib An Kreol Seselwa

Trwazyenm Vizyon: Latres pour Mezire

¹ Mon ti ganny en vizyon. Mon ti war en zonm avek en latres dan son lanmen.

² Alor, mon ti demann li, “Kote ou pe ale?” I ti reponn, “Mon pe al mezir Zerizalenm, pour mwan konn son larzer e son longer.”

³ Alor, lanz ki ti koz avek mwan ti avans ver en lot lanz ki ti'n osi vin rankontre li.

⁴ Sa dezyenm lanz ti dir li, “Taye! Al dir avek sa zennonm: Zerizalenm pou ganny abite parey bann vilaz ki napa okenn miray. Annefe, en kantite dimoun ek zannimo pou vin viv kot li.”

⁵ La sa ki SENYER liniver i deklare, “Deor, mon pou en miray dife otour li. Anndan, mon pou son laglwar.”

Senyer I Demann bann Egzile pour Retournen

⁶ La sa ki SENYER liniver i deklare: Leve! Sove, kit pei Nor. Mon'n dispers ou dan tou direksyon, parey divan ki soufle dan kat kwen lesyel. SENYER ki deklare.

⁷ Zabitan Siyon! Ou ki reste dan Babilonn! Sove.

⁸ La sa ki SENYER liniver i deklare konsernan bann nasyon ki'n depouy ou: Sa enn ki tous ou, pou ganny zafer avek mwan.

⁹ Gete aprezan! Mon pou lev mon lanmen kont zot e zot prop lesklav pou depouy zot. Alor, zot ava konnen ki SENYER liniver ki'n anvoy mwan.

¹⁰ Zabitan Siyon i sante: Fer lafet! Akoz, la sa ki SENYER i deklare: Mon pou vini e mon pour reste parmi zot.

¹¹ Sa zour, bokou nasyon pou rasanble otour SENYER. Zot ava vin mon pep; e mon pou reste parmi zot. Alor, zot ava konnen ki SENYER liniver ki'n anvoy mwan kot zot.

¹² SENYER pou swazir Zida koman son posesyon dan later sakre, e ankor en fwa, i pou swazir Zerizalenm.

¹³ Gard silans devan SENYER, akoz in leve sorti dan son sanktyer sakre.