Zakari 14 - Labib An Kreol Seselwa

Zerizalenm ek Lezot Nasyon

¹ Sa zour ki pour SENYER pe vini, kan bann depouy lager pou ganny partaze parmi zot.

² Mon pe rasanble tou bann nasyon pour atak Zerizalenm. Lavil pou ganny kaptire, bann lakaz met anba lao, e bann fanm pou ganny vyole. Lanmwatye bann zabitan Zerizalenm pou ganny deporte; me sa lot lanmwatye ava kapab reste dan lavil.

³ Alor, SENYER pou sorti e konbat sa bann nasyon, parey i fer sak fwa i al lager.

⁴ Sa zour, i pou poz son lipye lo Montanny Zolivye ki lo kote Les Zerizalenm. Montanny Zolivye pou fann an de e form en gran vale dan direksyon Les-Was. Lanmwatye montanny pou rekil dan Nor e lot lanmwatye dan Sid.

⁵ Alor, zot pou sove an pasan par vale montanny SENYER, akoz vale sa bann montanny pou al ziska Asal. Zot pou taye parey ler zot ti fer pour sov tranblemandter dan letan Ozyas, lerwa Zida. Apre sa, SENYER mon Bondye pou arive avek tou son bann lanz ki servi li.

⁶ Sa zour, lalimyer pa pou neseser. I pou nepli fer fre; pa pou annan laglas.

⁷ Sa zour ki zis SENYER i konnen, pa pou annan ni lizour, ni lannwit e kan lannwit pou tonbe, i pou reste kler.

⁸ Sa zour, delo pir pou sorti dan Zerizalenm; lanmwatye pou koul lo kote Les, lot lanmwatye pou koul lo kote Was. Sa pou kontinyen pandan lete koman liver.

⁹ Alor, SENYER ava vin lerwa partou lo later. Sa zour, zis SENYER ki pou ganny adore koman Bondye.

¹⁰ Pei antye pou vin en laplenn, depi Geba ziska Rimonn ki sitye dan Sid avek Zerizalenm. Me Zerizalenm pou reste kot i ete lo oter, depi Laport Benzamen kot vye laport ti ete, ziska laport Kwen, e depi Latour Hananeel, ziska bann basen lerwa kot i kraz rezen pour fer diven.

¹¹ Dimoun pou vin reste la, akoz zanmen ankor, Zerizalenm pou ganny detri. Bann zabitan pou viv an sekirite.

¹² La maler ki SENYER pou anvoy lo tou bann pep ki'n lager kont Zerizalenm: Zot lapo pou pouri pandan ki zot ankor debout; zot lizye pou pouri dan son orbit e zot lalang pou pouri dan zot labous.

¹³ Sa zour, SENYER pou anvoy en gran lafreyer lo zot. Sakenn pou anponny son kanmarad e zot ava lager ant zot.

¹⁴ Menm Zida pou lager dan Zerizalenm. Alor, zot pou pran tou larises bann nasyon dan zalantour: Lor, larzan, lenz an kantite.

¹⁵ En fleo parey pou tap bann seval, mile, samo, bourik e tou bann zannimo ki pou dan zot bann kan.

¹⁶ Alor, dimoun ki ti'n vin fer lager kont Zerizalenm e ki pa'n ganny touye, pou monte toulezan. Zot pou vin ador lerwa, SENYER liniver e selebre lafet bann Payot.

¹⁷ Sa fanmir ki pa mont Zerizalenm pour ador lerwa, pa pou ganny lapli.

¹⁸ Si bann fanmir Ezipsyen pa monte, e pa prezant zot, alor fleo ki SENYER in frap bann nasyon ki pa monte pour selebre lafet Payot pour tonm lo zot.

¹⁹ Sa i ava pinisyon Lezip e pinisyon tou bann nasyon ki pa monte pour selebre lafet Payot.

²⁰ Sa zour, zot ava ekri lo laklos bann seval: Konsakre pour SENYER. Bann marmit ki servi dan tanp SENYER, pou osi sakre ki bann bol ki servi devan lotel.

²¹ Tou bann marmit ki annan dan Zerizalenm e dan Zida ava ganny konsakre pour SENYER liniver. Konmsa, tou dimoun ki vin ofer sakrifis, ava servi zot pour bwi lavyann pour sakrifis. Sa zour, pou nepli annan marsan dan tanp SENYER liniver.