Zakari 11 - Labib An Kreol Seselwa

Bann Gran Pei I Ganny Detri

¹ Liban! Ouver ou bann laport, pour ki dife i devor ou bann pye sed.

² Bann pye sipre i plere, akoz bann pye sed in tonbe, akoz bann zoli pye dibwa in ganny detri.

³ Ekout bann berze ki pe plennyen, akoz zot laglwar in disparet. Ekout bann lyon ki pe kriye, akoz lafore dan bor larivyer Zourden in ganny detri.

De Kalite Berze

⁴ La sa ki SENYER mon Bondye i deklare: Vey lo troupo ki pe al ganny anmennen labatwar.

⁵ Dimoun ki aste zot, i touy zot, san ganny pini. Dimoun ki vann zot, zot dir: Loue SENYER, akoz mon'n vin ris. Zot prop berze napa okenn pitye pour zot.

⁶ La sa ki SENYER i deklare: Mon pou nepli annan pitye pour bann zabitan later. Mon pou fer sakenn zot tonm dan lanmen son vwazen e sakenn zot dan lanmen son lerwa. Bann lerwa pou devaste later e mon pa pou delivre personn dan zot lanmen.

⁷ Alor, mon ti vey lo mouton bann marsan. Mon ti'n vin berze sa troupo ki'n ganny kondannen pour labatwar. Mon ti pran de baton; mon ti nonm enn Faver, lot Linite e mon ti pran swen bann mouton.

⁸ Apre zis en mwan, mon ti sas sa trwa berze. Apre, mon ti perdi pasyans avek bann mouton. Zot osi, zot ti deteste mwan.

⁹ Alor mon ti deklare: Mon pou nepli ou berze. Sa enn ki pou mor, les li mor! Sa enn ki pou disparet, les li disparet! Les bann sirvivan devor kanmarad!

¹⁰ Mon ti pran mon baton Faver e mon ti kas li. Konmsa, mon ti kas lalyans ki mon ti'n fer avek tou bann pep.

¹¹ Sa zour, sa lalyans ti ganny anile e bann marsan troupo ki ti pe obzerv mwan, ti konnen ki SENYER ti pe koz atraver mwan.

¹² Alor, mon ti dir zot: Si i fer zot plezir, donn mwan mon lapey; si zot pa oule, garde. Alor, zot ti donn mwan 30 pyes larzan pour mon lapey.

¹³ La sa ki SENYER ti dir mwan: Met sa larzan, dan trezor. Sa i en zoli pri, ki montre ki valer mon annan pour zot. Alor, mon ti pran sa 30 pyes larzan e mon ti zet dan trezor, dan tanp SENYER.

¹⁴ Apre sa, pou kas relasyon lafanmir ant Zida ek Izrael, mon ti kas mon dezyenm baton: Linite.

¹⁵ La sa ki SENYER ti dir mwan: Aprezan, fer krwar ou en berze ki bet!

¹⁶ Annefe, mon pe al swazir dan pei, en berze ki pa pran swen bann mouton ki pe mor, oubyen al rod sa enn ki'n perdi. I pa pou pran swen sa enn ki'n ganny blese, oubyen angres sa enn ki an bonn sante. Me, i pou devor sa bann ki byen gra e i pou fann zot sabo.

¹⁷ Maler lo sa fo berze, ki abandonn son troupo! Mon demann lepep koup son lebra e krev son lizye kote drwat!