Sofoni 2 - Labib An Kreol Seselwa

Lapel pour Retourn ver Senyer

¹ Rasanble zot, vin ansanm, nasyon san pider,

² avan ki en lord i sorti, avan sa zour i anvole parey en bren lapay, avan ki gro lakoler SENYER i tonm lo zot, avan ki sa zour lakoler SENYER i arive!

³ Rod SENYER! Zot tou bann dimoun senp dan pei, bann ki azir avek drwatir. Rod lazistis ek limilite! Petet, zot ava ganny proteze, zour lakoler SENYER.

⁴ Gaza pou ganny abandonnen; Askelonn pou ganny detri; Zabitan Asdod pou ganny sase gran lizour; Ekronn pou ganny demoli.

⁵ Maler pour bann zabitan obor lanmer, bann Keretit! SENYER in pronons en zizman kont zot: Kanaan, pei Filisten! Mon pou detri ou. Mon pou fer disparet tou ou bann zabitan.

⁶ Ou borlanmer pou vin bann laplenn zerb pour bann berze, bann park pour bann troupo.

⁷ Leres sirvivan pep Zida ki pou okip sa rezyon, kot zot pou sonny zot bann zannimo. Aswar, zot pou al dormi dan bann lakaz Askelonn. SENYER, zot Bondye, pou azir dan zot faver. I pou retabli zot sityasyon.

⁸ Mon'n antann bann ensilt sorti kot bann Moabit, bann Amonit pe gognarde. Zot in ensilte mon pep e pran zot later pour agrandi pour zot.

⁹ Alor, la sa ki SENYER liniver, Bondye Izrael, i deklare: Osi vre ki mon vivan, Moab pou vin parey Sodonm; bann Amonit parey lavil Gomor. Sa pei pou vin en landrwa kouver avek move zerb, bann basen disel, en pei detri pour touzour. Leres sirvivan parmi mon pep pou depouy li. Restan mon pep pou pran posesyon zot patrimwann.

¹⁰ Sa pou ariv zot akoz zot lorgey, akoz zot in ensilte pep SENYER liniver.

¹¹ SENYER pou azir dan en fason terib kont zot. I pou detri tou bann bondye lo later. Bann nasyon dan bann zil lwenten, pou prosternen devan li.

Kont bann Pep dan Nor e dan Sid

¹² Zot osi, bann Etyopyen! Zot pou ganny masakre.

¹³ SENYER pou lev son lanmen kont bann zabitan dan Nor e fer disparet Asiri. I pou fer Niniv vin en landrwa devaste, sek parey dezer.

¹⁴ Bann troupo ek tou kalite zannimo pou viv la: Ibou ek katiti pou pas lannwit parmi son bann kolonn. Zwazo pou vin kriy obor lafnet. Larin i partou, depi lantre, akoz bann lanbri an sed in ganny arase.

¹⁵ Sanmenm sa ki pou arive avek Niniv, sa lavil fyer ki ti an sekirite. Son bann zabitan ti dir: Mwan ki la! Napa koman mwan! Aprezan, in ganny detri; i'n vin en landrwa maske pour zannimo! Tou sa ki pas par la i gognarde e fer bann zes endesan.