Rit 3 - Labib An Kreol Seselwa

Rit I Ganny en Mari

¹ En lot zour, Naomi ti dir avek Rit, “Mon fiy, mon bezwen fer en parman rod en lavenir pour ou, pour ki ou ava kapab viv ere.

² Parey ou konnen, Boaz ki'n les ou travay avek son bann servant i nou fanmir pros. Tanto Boaz pou al kot son plantasyon pour bat son bann zepi mai.

³ Alor, pran en bon ben, met lesans e met ou pli zoli lenz. Desann kot i pe bat son mai, me pa les li konnen ki ou la ziska ki i'n fini manze e bwar.

⁴ Kan i al dormi, get byen son plas kot i alonze. Apros kot li, dekouver son lipye e alonz obor li. I pou dir ou li menm sa ki fodre ou fer.”

⁵ Rit ti reponn, “Mon pou fer tou sa ki ou'n dir mwan.”

⁶ Alor, Rit ti desann kot Boaz ti pe bat son mai e i ti fer egzakteman sa ki son belmer ti'n rekomann li.

⁷ Kan Boaz ti'n fini manze e bwar, e i ti santi li byen, i ti al dormi obor son ta legren. Apre sa, Rit ti aprose dousman, dekouver son lipye, e alonz obor li.

⁸ Ver minwi Boaz ti sote, e sanz pozisyon, e la ti annan en fanm pe dormi obor son lipye.

⁹ Boaz ti demande, “Lekel ou?” Rit ti reponn, “Mwan Rit, ou servant. Pran mwan anba ou proteksyon, akoz ou en paran pros.”

¹⁰ Boaz ti dir, “SENYER ava beni ou, mon fiy! Ou'n demontre en gran fidelite anver fanmir ou belmer, menm plis ki avan. Ou pa'n al rod bann zennzan, ki swa ris oubyen pov.

¹¹ Aprezan, mon fiy, pa trakase, mon pou fer pour ou tou sa ki ou demande, akoz ou en fanm ki annan valer, tou bann dimoun dan lavil i konnen.

¹² Annefe, i vre ki mon en fanmir pros, me selman, i annan en lot zonm ki en fanmir pli pros ki mwan.

¹³ Reste isi pour leres lannwit, e demen bomaten, mon ava war. Si i oule pran son responsabilite anver ou, mon ava les li fer; me si i pa oule, bon, mon promet devan SENYER, mon pou pran mon responsabilite anver ou. An atandan, reste dormi ziska bomaten.”

¹⁴ Alor, Rit ti dormi kot lipye Boaz ziska bomaten, me i ti leve avan ki personn i kapab rekonnet li. Boaz ti dir dan li menm: Fodre pa ki dimoun i konnen ki sa fanm in vin la.

¹⁵ Boaz ti dir li, “Anmenn sa manto ki lo ou e tenir li byen.” Alor, Rit ti tenir son manto, e Boaz ti met anviron 15 kilo lorz la dan, e i ti met lo zepol Rit. Apre sa, Rit ti retourn dan lavil.

¹⁶ Letan Rit ti ariv kot son belmer, son belmer ti demande, “Mon fiy, ki mannyer ou'n pase?” Alor, Rit ti rakont Naomi tou sa ki Boaz ti'n fer pour li.

¹⁷ Rit ti azoute, “I'n donn mwan tou sa lorz an dizan: Ou pa devre retourn kot ou belmer lanmen vid.”

¹⁸ Naomi ti dir li, “Pran pasyans, mon fiy, espere ziska ki nou konnen konman sa zafer pou tournen. Sa zonm pa pou satisfe, ziska ki i ava'n regle sa zafer.”