Revelasyon 8 - Labib An Kreol Seselwa

Setyenm Sele

¹ Kan Zenn Mouton ti ouver setyenm sele, ti annan en silans pandan anviron en demi er dan lesyel.

² Alor, mon ti war sa set lanz ki debout devan Bondye. Sakenn ti ganny en tronpet.

³ En lot lanz avek en lansanswar annor dan son lanmen, ti vin debout kot lotel. Zot ti donn li en kantite lansan pour ofer avek lapriyer pep Bondye, lo lotel annor devan tronn.

⁴ Lafimen lansan sorti dan lanmen lanz ti monte devan Bondye, avek lapriyer pep Bondye.

⁵ Apre, lanz ti pran lansanswar, e ranpli li avek dife sorti lo lotel e zet li lo later. Toudswit ti annan loraz, tapaz bann lavwa, zekler ek tranblemandter.

Bann Tronpet

⁶ Alor, sa set lanz ki ti annan sakenn en tronpet, ti prepar zot pour soufle.

⁷ Premye lanz ti soufle dan son tronpet. Lagrel ek dife melanze avek disan ti devers lo later. En tyer later, en tyer bann pye dibwa ek tou zerb ver ti ganny brile.

⁸ Dezyenm lanz ti soufle dan son tronpet. En keksoz ki ti parey en gran montanny anflanm ti ganny zete dan lanmer. En tyer lanmer ti vin disan.

⁹ En tyer bann kreatir dan lanmer ti mor, e en tyer bann bato ti ganny detri.

¹⁰ Trwazyenm lanz ti soufle dan son tronpet. En gran zetwal ti tonbe sorti dan lesyel e brile koman en flanbo. I ti tonm lo en tyer bann larivyer ek sours delo.

¹¹ Sa zetwal i apel Lanmertim. En tyer delo ti vin anmer e bokou dimoun ti mor, akoz delo ti'n vin anmer.

¹² Katriyenm lanz ti soufle dan son tronpet. En tyer soley ti ganny afekte, avek en tyer lalin e en tyer bann zetwal; zot ti perdi en tyer zot laklerte. Lizour ti perdi en tyer son lalimyer e lannwit parey.

¹³ Answit, mon ti regarde: Mon ti antann en leg ki ti pe anvole byen o dan lesyel. I ti kriye avek en lavwa for: Maler! Maler! Maler lo bann zabitan later, akoz sa bann tronpet ki sa trwa lanz pe al soufle.