Revelasyon 7 - Labib An Kreol Seselwa

Pep Bondye: 144,000

¹ Apre sa, mon ti war kat lanz pe debout dan kat kwen later. Zot ti pe tenir sa kat divan, pour ki okenn pa soufle, ni lo later, ni lo lanmer, ni lo okenn pye dibwa.

² Apre, mon ti war en lot lanz monte, sorti kote soley leve, avek sele Bondye ki vivan. Avek en lavwa for, i ti kriy avek sa kat lanz ki ti'n ganny pouvwar pour ravaz later ek lanmer:

³ Pa fer dimal later, lanmer oubyen okenn pye dibwa, ziska ki nou ava'n fini mark avek sele fron bann serviter Bondye.

⁴ Mon ti antann dir lakantite bann ki ti ganny marke avek sele Bondye: 144,000 parmi tou bann tribi Izrael.

⁵ Dan tribi Zida, 12,000 in ganny marke avek sele. Dan tribi Riben 12,000; dan tribi Gad 12,000; dan tribi Aser, 12,000;

⁶ dan tribi Neftali, 12,000; dan tribi Manase, 12,000;

⁷ dan tribi Simeon, 12,000; dan tribi Levi, 12,000; dan tribi Izakar, 12,000;

⁸ dan tribi Zabilon, 12,000; dan tribi Zozef, 12,000; dan tribi Benzamen, 12,000.

En gran lafoul

⁹ Apre sa, mon ti regarde e mon ti war en gran lafoul ki personn pa ti kapab konte, sorti dan tou nasyon, tribi, pep ek lalang. Zot ti debout devan tronn e devan Zenn Mouton, abiye dan rob blan, avek brans palm dan lanmen.

¹⁰ Zot ti kriye avek en lavwa for: Nou delivrans i sorti kot nou Bondye ki pe asiz lo tronn e kot Zenn Mouton!

¹¹ Tou bann lanz ti debout otour tronn, otour bann ansyen ek sa kat et vivan. Zot ti tonm lafas ater e zot ti ador Bondye.

¹² Zot ti dir: Amenn! Louanz, laglwar, lasazes rekonesans, loner, pwisans, lafors pour nou Bondye pour touzour. Amenn!

¹³ Alor, enn parmi bann ansyen ti demann mwan, “Lekel sa bann dimoun ki'n abiye dan rob blan e kote zot sorti?”

¹⁴ Mon ti reponn li, “Mon senyer! Ou ki konnen.” Alor, i ti dir mwan, “Zot sa bann ki'n pas atraver en gran soufrans. Zot in lav zot rob e blansi li dan disan Zenn Mouton.

¹⁵ Pour sa rezon, zot devan tronn Bondye e zot ofer li ladorasyon lizour koman aswar dan son Tanp. Sa enn ki asize lo tronn pou protez zot.

¹⁶ Zot pa pou zanmen lafen, ni swaf ankor. Soley pa pou tap lo zot; okenn lasaler pa pou bril zot ankor.

¹⁷ Annefe, Zenn Mouton ki dan milye tronn pou vin zot berze e i pou gid zot kot sours delo ki donn lavi. Bondye pou eswiy tou larm dan zot lizye.”