Revelasyon 5 - Labib An Kreol Seselwa

Liv Sele

¹ Apre sa, mon ti war dan lanmen drwat sa enn ki ti pe asiz lo tronn, en liv dan laform en roulo ki ti'n ekri anndan deor e kaste avek set sele.

² Mon ti war en lanz pwisan ki ti proklanmen avek en lavwa for: Lekel ki diny pour kas sa bann sele e ouver sa liv?

³ Me ti napa personn dan lesyel, ni lo later, ni anba later, ki ti annan pouvwar ouver sa liv, ni get sa ki annan ladan.

⁴ Mon ti pler en kantite, akoz personn pa ti diny pour ouver sa liv, ni get sa ki annan ladan.

⁵ Alor, enn parmi bann ansyen ti dir mwan: Pa plere! La Lyon Tribi Zida, desandan David. In ganny laviktwar pour kas sa set sele e ouver sa liv.

⁶ Dan milye tronn, mon ti war en Zenn Mouton pe debout, antoure par sa kat kreatir vivan ek bann ansyen. I ti sanble ki sa Zenn Mouton ti'n ganny ofer an sakrifis. I ti annan set korn ek set lizye ki ti sa set lespri Bondye ki ti'n ganny anvoye partou lo later.

⁷ Sa Zenn Mouton ti avanse e i ti pran sa liv ki ti dan lanmen drwat sa enn ki ti pe asiz lo tronn.

⁸ Kan i ti pran sa liv, sa kat et vivan ek sa 24 ansyen ti prosternen devan sa Zenn Mouton. Sakenn ti annan en laarp ek bann lakoup annor ranpli avek lansan ki reprezant lapriyer bann krwayan.

⁹ Zot ti sant en nouvo kantik: Ou diny pour resevwar sa liv e kas son bann sele. Annefe, ou ti ganny egorze, e par ou disan, ou'n reaste pour Bondye, zonm dan tou ras, lalang, pep ek nasyon.

¹⁰ Ou'n fer zot vin en rwayonm pret pour servi non Bondye, e zot pou rennyen lo later.

¹¹ Mon ti get ankor: Otour tronn ek bann kreatir vivan, mon ti antann lavwa en gran kantite lanz, mil milyon zot.

¹² Zot ti sante avek en lavwa byen for: Zenn Mouton ki'n ganny egorze, i diny pour resevwar pwisans, larises, lasazes, lafors, loner, laglwar ek louanz.

¹³ Mon ti osi antann tou bann kreatir dan lesyel, lo later, anba later, dan lanmer e tou kreatir dan liniver antye ki ti pe sante: Pour li, sa enn ki pe asiz lo tronn e pour Zenn Mouton! Louanz, loner, laglwar, pwisans pour touzour!

¹⁴ Sa kat kreatir vivan ti reponn: Amenn! Bann ansyen ti prosternen e adore.