Revelasyon 3 - Labib An Kreol Seselwa

Let pour Legliz Sard

¹ Ekri Lanz Legliz dan Sard: La sa ki sa enn ki posed sa set Lespri Bondye ek sa set zetwal i deklare: Mon konn ou bann aktivite: Zot dir ou vivan, me ou'n mor.

² Leve! Afermi sa ki reste ankor dan ou, avan ki i mor konpletman. Annefe, mon pa'n war okenn ou bann aktivite parfe devan mon Bondye.

³ Pa oubliye ki mannyer ou'n resevwar e antann Laparol. Obei li e sanz ou lavi. Si ou pa sanze, mon pou vin koman en voler e ou pa pou konnen ki ler mon pou vin sirprann ou.

⁴ Sepandan, dan Sard menm, i annan serten ki pa'n sali zot lenz. Zot ava akonpanny mwan abiye dan lenz blan, akoz zot diny.

⁵ Ensi, sa bann ki'n ganny laviktwar, pou abiy dan en lenz blan. Mon pa pou efas zot non dan liv lavi, me mon pou rekonnet zot devan mon Papa e devan son bann lanz.

⁶ Sa enn ki annan zorey! Ekout sa ki Lespri i dir avek bann Legliz.

Let pour Legliz Filadelfi

⁷ Ekri Lanz Legliz dan Filadelfi: La sa ki sa enn ki Sen e Vre i deklare; sa enn ki posed lakle David, ki ouver e personn pa kapab fermen, ki fermen e personn pa kapab ouver:

⁸ Mon konn ou bann aktivite. La mon'n plas devan ou en laport ouver ki personn pa kapab fermen. Ou napa bokou lafors, e pourtan, ou'n obei mon parol e ou pa'n renye mon non.

⁹ La sa ki mon pou fer avek bann ki form lasanble Satan, sa bann manter ki pretann ki zot Zwif me ki pa Zwif: Mon pou fer zot vin azenou devan ou e zot ava rekonnet ki mon'n kontan ou.

¹⁰ Akoz ou'n obei mon lord avek perseverans, mon pou protez ou pandan bann letan leprev ki pe vini, pour teste bann zabitan later.

¹¹ Mon pe vini byento. Gard byen for sa ki ou posede pour ki personn pa aras ou, ou kouronn.

¹² Sa enn ki ganny laviktwar, mon pou fer li vin en pilye dan tanp mon Bondye e i pa pou zanmen sorti. Mon pou ekri lo li, non mon Bondye, ek non lavil mon Bondye: Nouvo Zerizalenm ki desann sorti dan lesyel kot mon Bondye. Mon pou osi ekri mon nouvo non lo li.

¹³ Sa enn ki annan zorey! Ekout sa ki Lespri i dir avek bann Legliz.

Let pour Legliz Laodise

¹⁴ Ekri Lanz pour Legliz dan Laodise: La sa ki Amenn, temwen fidel e vre, sa enn ki konmansman kreasyon Bondye i deklare:

¹⁵ Mon konn ou bann aktivite: Ou pa ni fre, ni so. Ou ti devre swa fre, swa so.

¹⁶ Alor, akoz ou tyed, akoz ou pa ni fre, ni so, mon pou vomi ou par mon labous.

¹⁷ Ou dir: Mon ris, mon'n anrisi, e mon pa bezwen nanryen. Me ou pa konnen konbyen ou malere, mizerab, pov, aveg e touni.

¹⁸ Pour sa rezon, mon konsey ou: Vin aste avek mwan lor ki'n ganny teste dan dife, e ou ava vin ris. Vin aste lenz blan kot mwan, pour ou abiye e kasyet laont ou touni. Vin aste osi en remed pour ou pas lo ou lizye pour ou kapab war kler.

¹⁹ Mon koriz e mon pini tou sa bann ki mon kontan. Montre bokou devouman, e sanz ou konportman.

²⁰ Ekoute! La mon pe debout devan laport, e mon tape. Si en dimoun i antann mon lavwa e i ouver laport, mon pou antre se li, mon pou manz avek li, e li avek mwan.

²¹ Sa enn ki ganny laviktwar, mon pou met li asiz avek mwan lo mon tronn, parey mwan mon'n ganny laviktwar e mon'n asiz avek mon Papa lo son tronn.

²² Sa enn ki annan zorey! Ekout sa ki Lespri i dir avek bann Legliz.