Revelasyon 22 - Labib An Kreol Seselwa

¹ Apre sa, lanz ti montre mwan larivyer delo lavi, ki ti kler koman kristal, sorti kot tronn Bondye ek tronn Zenn Mouton.

² I ti koul dan milye lari dan lavil. Lo de bor sa larivyer, ti annan pye dibwa lavi ki prodwi 12 rekolt, en rekolt par mwan. Fey sa pye dibwa i servi pour geri tou bann nasyon.

³ Pou nepli annan malediksyon, akoz tronn Bondye ek tronn Zenn Mouton pou dan lavil, e zot bann serviter pou ador zot.

⁴ Zot pou war son vizaz e son non pou ganny enskri lo zot fron.

⁵ Pou nepli annan lannwit. Zot pou nepli bezwen ni lalimyer en lalanp, ni lalimyer soley, akoz Senyer Bondye pou vin zot lalimyer. Zot pou renny pour touzour.

Zezi I Retournen

⁶ Apre, lanz ti dir mwan: Sa bann parol i sir e vre. Senyer, Bondye ki enspir bann profet, in anvoy son lanz pour montre son bann serviter sa ki devre arive byento.

⁷ Zezi i dir: Mon pe vini byento! Byennere sa enn ki obei parol profesi dan sa liv!

⁸ Mwan, Zan, mon'n tande e mon'n war tou sa bann keksoz. Kan mon ti war tousala, mon ti tonm ater pour ador lanz ki ti pe montre mwan sa bann keksoz.

⁹ Me i ti dir mwan: Pa fer sa! Mwan osi mon en serviter parey ou, parey ou bann frer bann profet ek tou bann ki obei parol sa liv. Bondye ki ou bezwen adore.

¹⁰ I ti azoute: Pa gard sekre parol profesi ki dan sa liv, akoz letan pour tousala arive i pros.

¹¹ Malfeter ava kontinyen pratik plis lemal. Dimoun sal ava kontinyen reste dan zot salte. Sa enn ki bon ava kontinyen pratik plis sa ki byen e sa enn ki sen ava kontinyen vin touzour pli sen.

¹² Zezi ti azoute: Mon pe vini byento. Mon pou anmenn avek mwan mon rekonpans pour mwan pey sakenn dapre son bann aksyon.

¹³ Mwan menm, Alfa ek Omega, premye ek dernyen, konmansman ek lafen.

¹⁴ Byennere bann ki lav zot rob pour ki zot ganny drwa manz fri pye dibwa lavi, e antre dan lavil par laport.

¹⁵ Me deor i annan tou bann dimoun degoutan, bann sorsye, bann prostitye, bann kriminel, tou bann adorater zidol, ek tou bann ki kontan e pratik mansonz!

¹⁶ Mwan Zezi, mon'n anvoy mon lanz avek sa temwannyaz konsernan bann Legliz. Mwan menm desandan David; mwan menm sa zetwal ki briye granmaten.

¹⁷ Lespri ek Nouvel Marye i dir: Vini! Ou ki tande, dir: Vini! Sa ki swaf, vini! Sa ki anvi, vin pran delo lavi gratwitman!

Konklizyon

¹⁸ La mon lavertisman solannel pour tou sa ki antann parol profesi ekri dan sa liv: Si en dimoun i azout keksoz avek sa bann parol, Bondye pou azout pour li, bann fleo ki'n ganny dekri dan sa liv.

¹⁹ Si en dimoun i retir okenn parol profesi dan sa liv, Bondye pou retir son par dan pye dibwa lavi e dan lavil sen ki'n ganny dekri dan sa liv.

²⁰ Sa enn ki ateste sa bann keksoz i deklare: Wi! Mon pe vini byento! Amenn! Vini, Senyer Zezi!

²¹ Lagras Senyer Zezi ava avek zot tou! Amenn.