Revelasyon 21 - Labib An Kreol Seselwa

Nouvo Lesyel ek Nouvo Later

¹ Alor, mon ti war en nouvo lesyel ek en nouvo later akoz sa premye lesyel ek sa premye later ti'n disparet. Lanmer osi ti nepli egziste.

² Mon ti war lavil sen desann sorti dan lesyel kot Bondye, nouvo Zerizalenm ki ti'n dekore parey en nouvel marye abiye pour son mari.

³ Mon ti antann en lavwa for sorti kot tronn kriye: La aprezan, Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye.

⁴ I pou eswiy tou larm dan zot lizye. Lanmor pou nepli egziste. Pou nepli annan ni dey, ni larm, ni soufrans, akoz lemonn ansyen in disparet.

⁵ Sa enn ki ti pe asiz lo tronn ti dir: La mon refer tou keksoz nouvo. Apre i ti dir mwan: Ekri! Sa bann parol i serten e vre.

⁶ I ti dir mwan: Tou keksoz in akonpli! Mwan menm Alfa ek Omega, konmansman ek lafen. Sa enn ki swaf, mon pou donn li gratwitman drwa bwar dan sours delo lavi.

⁷ Sa enn ki ranport laviktwar pou erit tousala. Mon pou vin son Bondye e li, i pou vin mon garson.

⁸ Me pour bann las, bann enfidel, bann dimoun degoutan, bann kriminel, bann prostitye, bann sorsye, bann adorater zidol, ek tou bann manter, zot plas pou dan lak dife ek souf. Sa i dezyenm lanmor.

Nouvo Zerizalenm

⁹ Alor, enn parmi sa set lanz ki ti annan sa set lakoup ranpli avek set dernyen fleo, ti vin kot mwan. I ti dir mwan: Vini! Mon ava montre ou nouvel marye, sa enn ki'n marye avek Zenn Mouton.

¹⁰ Lespri ti transport mwan lo en gran montanny. I ti montre mwan lavil sen, Zerizalenm, ki ti pe desann, sorti dan lesyel kot Bondye.

¹¹ I ti briye avek laglwar Bondye. Son lekla ti resanble en pyer presyez tre rar, parey zasp, kler parey kristal.

¹² I ti annan en gran miray, avek 12 laport, e 12 lanz ti pe vey bann laport. Lo sak baro, non sakenn parmi bann 12 tribi Izrael ti'n ganny enskri.

¹³ Lo kote Les ti annan trwa laport; lo kote Nor, trwa laport; lo kote Sid, trwa laport, e lo kote Was, trwa laport.

¹⁴ Miray sa lavil ti annan 12 ros fondasyon, e lo sak ros, ti'n ekri non bann 12 zapot Zenn Mouton.

¹⁵ Lanz ki ti pe koz avek mwan ti annan avek li en baton annor, pour li mezir lavil, son bann laport ek son miray.

¹⁶ Lavil ti annan laform kare. Son longer ti parey avek son larzer. Sa lanz ti mezir lavil avek son baton. Lavil ti mezir 2,200 kilomet; son longer, son larzer ek son oter ti parey.

¹⁷ Lanz ti osi mezir miray: 60 met, dapre en mezir imen ki lanz ti servi.

¹⁸ Miray ti konstri an zasp, tandis ki lavil ti annor pir, kler koman ver.

¹⁹ Bann ros fondasyon miray lavil ti dekore avek toudsort kalite pyer presyez. Premye pyer fondasyon ti an zasp, dezyenm ti an safir, trwazyenm an agat, katriyenm an emerod,

²⁰ senkyenm an oniks, sizyenm an sardwann, setyenm an krizolit, wityenm an beril, nevyenm an topaz, dizyenm an krizopraz, onzyenm an tirkwaz e douzyenm an ametis.

²¹ Sa 12 laport lavil ti 12 perl. Sak laport ti en sel perl e bann lari dan lavil ti annor pir, kler koman ver.

²² Mon pa ti war okenn tanp dan lavil akoz Senyer Bondye Toupwisan avek Zenn Mouton ti zot menm Tanp.

²³ Lavil pa bezwen ni soley, ni lalin pour ekler li, akoz laglwar Bondye i son lalimyer, e Zenn Mouton i son lalanp.

²⁴ Tou pep lo later pou mars dan son lalimyer, e bann lerwa later pou anmenn zot larises dan lavil.

²⁵ Bann laport lavil pa pou zanmen fermen pandan lazournen, akoz laba pa pou annan lannwit.

²⁶ Zot pou anmenn laglwar ek loner bann nasyon dan lavil.

²⁷ Okenn lenpirte pa pou antre dan lavil, ni personn ki pratik bann akt degoutan ek mansonz. Zis bann ki zot non in ganny enskri dan liv lavi Zenn Mouton ki pou kapab antre.