Revelasyon 20 - Labib An Kreol Seselwa

Renny Pandan Mil An

¹ Apre sa, mon ti war en lanz desann sorti dan lesyel. I ti annan lakle labim ek en gran lasenn dan son lanmen.

² I ti sezi sa dragon, sa serpan lantikite, setadir dyab oubyen Satan. I ti ansenn li pour 1,000 an.

³ Lanz ti zet li dan labim, ki i ti fermen e sele pour ki i nepli kapab tronp bann nasyon ziska ki 1,000 an ava'n fini pase. Apre sa, fodre ki i ganny large pour en pti pe letan.

⁴ Apre, mon ti war bann tronn. Sa bann ki ti pe asize lo tronn ti'n ganny pouvwar pou zize. Mon ti osi war bann ki ti'n ganny egzekite akoz temwannyaz Zezi ek Parol Bondye. Zot pa ti'n ador sa bebet ni son zimaz, e zot pa ti'n resevwar mark sa bebet lo zot fron, ni lo zot lanmen. Zot ti resisite e renny avek Kris pandan 1,000 an.

⁵ Lezot bann mor pa ti resisite ziska ki sa 1,000 an ti'n pase. Sa i premye rezireksyon.

⁶ Byennere e sen, tou bann ki partisip dan sa premye rezireksyon. Dezyenm lanmor pou napa okenn pouvwar lo zot. Zot pou vin pret pour Bondye e pour Kris. Zot pou renny avek li pandan 1,000 an.

Laviktwar ek Zizman Final

⁷ Apre ki sa 1,000 an ava'n pase, Satan pou ganny large dan son prizon.

⁸ I pou sorti pour tronp bann nasyon dan tou kwen later, Gog ek Magog, pour rasanble zot pour lager. Zot pou osi nonbre ki disab lo bor lanmer.

⁹ Zot larme ti al lo later antye. Zot ti anserkle kan pep Bondye ek lavil byenneme. Me dife ti desann sorti dan lesyel e detri zot tou.

¹⁰ Dyab ki ti pe tronp zot, ti ganny zete dan lak dife avek souf, kot sa bebet ek son profet mansonz ti ete. Zot pou ganny tourmante lizour koman aswar e pour touzour.

¹¹ Apre, mon ti war en gran tronn blan e sa enn ki ti pe asiz lo la. Later ek lesyel ti disparet devan li; ti napa plas ankor pour zot.

¹² Mon ti war bann mor, gran koman pti, pe debout devan tronn, e bann liv ti'n ouver. Ti annan osi en lot liv ki ti'n ouver: Liv lavi. Bann mor ti ganny zize dapre sa ki zot ti'n fer, e dapre sa ki ti'n ganny ekri dan sa bann liv.

¹³ Lanmer ti rann son bann mor. Lanmor ek lemonn lanmor ti rann zot bann mor, e zot tou, zot ti ganny zize dapre bann aksyon ki zot ti'n fer.

¹⁴ Answit, lanmor ek lemonn lanmor ti ganny zete dan lak dife. Sa lak dife ti dezyenm lanmor.

¹⁵ Tou bann ki zot non pa ti ganny trouve ekri dan Liv lavi, ti ganny zete dan lak dife.