Revelasyon 2 - Labib An Kreol Seselwa

Let pour Legliz Efez

¹ Ekri Lanz Legliz dan Efez: La sa ki sa enn ki tenir sa set zetwal dan son lanmen drwat e ki mars parmi sa set portlanp annor i deklare:

² Mon konn tou ou bann aktivite, mon konn ou travay ek ou perseverans. Mon konnen ki ou pa kapab toler bann malfeter. Ou'n teste bann ki apel zot lekor zapot, me ki an realite pa vre, e ou'n dekouver ki zot bann manter.

³ Mon konnen ki ou annan perseverans. Ou'n soufer tou akoz mon non, e ou pa'n dekouraze.

⁴ Me sa ki mon annan kont ou, se ki ou'n perdi ou premye lanmour.

⁵ Alor, mazinen kote ou'n sorti pour tonbe. Detourn ou avek ou bann pese, e pratik sa bann aksyon parey o konmansman. Si ou pa abandonn ou pese, mon pou vin kot ou e mon pou tir ou portlanp dan son plas.

⁶ Me la sa ki dan ou faver: Parey mwan, ou deteste sa ki bann Nikolait i fer.

⁷ Sa enn ki annan zorey! Ekout sa ki Lespri i dir avek bann Legliz: Sa enn ki ranport laviktwar, mon pou donn li drwa manz fri pye dibwa ki donn lavi, ki dan paradi Bondye.

Let pour Legliz Smirn

⁸ Ekri Lanz Legliz dan Smirn: La sa ki Premye e Dernyen, sa enn ki ti'n mor e ki'n retourn vivan i deklare:

⁹ Mon konn ou bann soufrans, ek ou mizer. Pourtan, ou ris. Mon konn dimal ki bann swadizan Zwif, me ki pa Zwif i dir lo ou. An realite, zot form en lasanble Satan.

¹⁰ Pa per pour sa ki ou pou soufer. Dyab pou byento zet serten parmi zot dan prizon, pour teste zot. Zot pou bezwen soufer pandan dis zour. Me reste fidel ziska lanmor, e mon ava donn ou kouronn lavi.

¹¹ Sa enn ki annan zorey! Ekout sa ki Lespri i dir avek bann Legliz. Sa enn ki ranport laviktwar, pa pou konn en dezyenm lanmor.

Let pour Legliz Perganm

¹² Ekri Lanz Legliz dan Perganm: La mesaz sa enn ki annan lepe ki koup de kote:

¹³ Mon konnen kot ou reste: Lanmenm la kot tronn Satan i ete. Ou'n reste fidel pour mon non, e ou pa'n renye ou lafwa dan mwan, menm dan lepok kan Antipas, mon temwen fidel, ti ganny touye kot ou, la kot Satan i reste.

¹⁴ Sepandan, mon annan detrwa repros pour fer ou: Ou annan kot ou serten dimoun ki atase avek lansennyman Balaanm. I ti montre Balak konman pour fer bann Izraelit tonm dan pese: I ti fer zot manz lavyann ki'n ganny ofer avek zidol e fer zot pratik limoralite seksyel.

¹⁵ I osi annan kot ou serten ki pe swiv lansennyman bann Nikolait.

¹⁶ Aprezan, abandonn ou pese. Sankwa, mon pou vin kot ou byento e mon pou konbat kont sa bann dimoun, avek lepe ki sorti dan mon labous.

¹⁷ Sa enn ki annan zorey! Ekout sa ki Lespri i dir avek bann Legliz. Sa bann ki ranport laviktwar, mon pou donn zot lamann ki'n ganny kasyet. E mon pou donn sakenn zot en pti ros blan. Lo sa ros, in ganny ekri en nouvo non ki personn pa konnen, eksepte sa enn ki resevwar sa non.

Let pour Legliz Tyatir

¹⁸ Ekri Lanz Legliz dan Tyatir: La sa ki Garson Bondye i deklare, sa enn ki son lizye i parey laflanm dife, e son lipye i parey bronz poli:

¹⁹ Mon konn tou sa ki ou fer; mon konn ou lanmour, ou lafwa, ou devouman dan servis, ek ou perseverans. Ou konmela ou travay bokou plis ki o konmansman.

²⁰ Me la sa ki mon annan kont ou: Ou toler Zezabel, sa fanm ki pas li pour en profet. I tronp mon bann serviter e ansenny zot pratik limoralite, pour fer zot manz lavyann ki'n ganny ofer avek bann zidol.

²¹ Mon'n donn li letan pour abandonn son pese, me i pa oule repanti.

²² Pour sa rezon, mon pou zet li ek tou bann ki'n komet adilter avek li, lo en lili lasoufrans. Amwen ki zot abandonn sa bann move pratik ki zot in fer avek li.

²³ Mon pou osi met anmor tou son bann zanfan. Alor, tou bann Legliz ava konnen ki mon konn tou mazinasyon ek dezir zonm. Mon pou tret sakenn zot dapre sa ki zot i'n fer.

²⁴ Me pour lezot dan Tyatir, ki pa'n atas zot avek sa move lansennyman, ki pa'n aprann sa doktrin ki serten i dir, bann profon sekre Satan, mon deklare: Mon pa pou met okenn fardo lo zot.

²⁵ Me tenir for sa ki zot posede, ziska ki mon retournen.

²⁶ Sa enn ki ranport laviktwar, sa enn ki kontiny mon travay ziska lafen, mon pou donn li pouvwar lo bann nasyon.

²⁷ Avek en baton an fer, i pou diriz zot; i pou kas zot an morso parey bann po later.

²⁸ Parey mwan osi mon'n resevwar pouvwar avek mon Papa, mon pou donn li zetwal granmaten.

²⁹ Sa enn ki annan zorey! Ekout sa ki Lespri i dir avek bann Legliz.