Revelasyon 19 - Labib An Kreol Seselwa

Kantik Laviktwar

¹ Apre sa, mon ti antann en lavwa for, konmsi lavwa en gran lafoul dan lesyel ki ti kriye: Loue Senyer! Delivrans, laglwar ek pwisans i pour nou Bondye!

² Son zizman i vre e zis! I'n ziz sa gran prostitye ki'n ranpli later avek koripsyon ek son prostitisyon. Bondye in vanz disan son bann serviter ki zot i'n touye.

³ Zot ti dir ankor: Loue Senyer! Lafimen sa gran lavil i monte pour touzour.

⁴ Sa 24 ansyen ek sa kat et vivan ti prosternen e ador Bondye ki ti lo son tronn. Zot ti dir: Amenn! Loue Senyer!

Festen Maryaz Zenn Mouton

⁵ En lavwa sorti kot tronn ti dir: Rann glwar nou Bondye, zot tou son bann serviter, zot tou ki annan respe pour li, gran koman pti!

⁶ Apre sa, mon ti antann en lavwa konmsi ti lavwa en gran lafoul, parey tapaz gro delo ki koule, konmsi tapaz loraz. Sa lavwa ti pe dir: Loue Senyer! Nou Senyer nou Bondye Toupwisan i Lerwa.

⁷ Annou rezoui, annou selebre, annou rann glwar Bondye! Akoz ler maryaz Zenn Mouton in arive, e son nouvel marye in pare.

⁸ I'n ganny permisyon pour abiy dan linenn fen, klate e pir. Annefe, linenn fen i bann aksyon lazistis pep Bondye.

⁹ Alor, lanz ti dir mwan: Ekri: Byennere, bann ki ganny envite pour festen maryaz Zenn Mouton. I ti azoute: Sa i bann vre Parol Bondye.

¹⁰ Alor, mon ti tonm ater dan son lipye pour ador li, me i ti dir mwan: Non, pa fer sa! Mon en serviter parey ou ek ou bann frer ki gard temwannyaz Zezi. Ador Bondye. Annefe, temwannyaz Zezi i lespri profesi.

Laviktwar

¹¹ Answit, mon ti war lesyel ouver, e en seval blan ti aparet. Sa enn ki ti pe mont sa seval, ti apel Fidel e Vre. I zize e konbat avek lazistis.

¹² Son lizye i parey en laflanm dife, e lo son latet ti annan plizyer kouronn. Lo li, en non in ganny ekri, ki personn pa konnen, eksepte li menm.

¹³ I'n abiye dan en rob tranpe dan disan. Son non: Parol Bondye.

¹⁴ Bann larme lesyel, abiye dan linenn blan e pir, ti swiv li lo bann seval blan.

¹⁵ Dan son labous ti sorti en lepe byen koupe pour li detri bann nasyon. I pou renny lo zot avek en baton an fer. Avek son lipye, i pou pil diven gran lakoler Bondye Toupwisan dan preswar.

¹⁶ Lo son rob e lo son kwis, en non in ganny enskri: Lerwa tou bann lerwa, Senyer tou bann senyer.

¹⁷ Apre, mon ti war en lanz debout dan soley. Avek en lavwa for, i ti kriy avek tou bann zwazo dan lezer: Rasanble pour sa gran festen Bondye!

¹⁸ Vin manz laser bann lerwa, laser bann sef militer, laser bann gran, laser bann seval ek zot kavalye, laser tou dimoun, lib koman lesklav, pti koman gran.

¹⁹ Alor, mon ti war sa bebet, bann lerwa later avek zot larme ki ti'n rasanble pour lager kont sa enn ki ti lo seval e kont son larme.

²⁰ Sa bebet ti ganny kaptire, ensi ki sa fo profet ki ti'n fer bann siny devan li; bann siny ki ti tronp bann ki ti'n resevwar mark sa bebet ek bann ki ti ador son stati. Tou le de ti ganny zete vivan dan lak dife kot souf ti pe brile.

²¹ Leres ti ganny touye par lepe ki ti sorti dan labous sa enn ki ti pe mont sa seval. Bann zwazo ti manz tou zot laser ziska ki zot ti rasazye.