Revelasyon 17 - Labib An Kreol Seselwa

Sa Gran Prostitye

¹ Apre sa, enn parmi bann lanz ki ti pe tenir sa set lakoup ti vin koz avek mwan: Vini! Mon ava montre ou kondannasyon ki pe esper sa gran prostitye ki pe asize lo losean.

² Bann lerwa later in livre zot dan prostitisyon avek li e tou zabitan later in soule avek diven son prostitisyon.

³ Alor, mon ti ganny transporte par Lespri dan en landrwa dezer. Mon ti war en fanm pe asize lo en bebet kouler rouz, kouver avek bann non blasfenm. Sa bebet ti annan set latet ek dis korn.

⁴ Sa fanm ti'n abiy dan lenz rouz e kouver avek bizou annor, pyer presyez ek perl. Dan son lanmen, i ti annan en lakoup annor ranpli avek bann aksyon degoutan ek salte son lavi prostitisyon.

⁵ Lo son fron ti'n ekri en non sekre: Gran Babilonn, manman tou bann prostitye ek tou bann aksyon degoutan lo later.

⁶ Mon ti war ki sa fanm ti sou avek disan bann pep ki pour Bondye e avek disan bann martir pour Zezi. Kan mon ti war li, mon ti bokou etonnen.

⁷ Me lanz ti dir mwan: Akoz ou etonnen? Mon ava dir ou sinifikasyon sekre sa fanm ek sa bebet ki i pe asiz lo la, ki annan set latet ek dis korn.

⁸ Sa bebet ki ou'n war, ti deza vivan, me i nepli. I pou monte e sorti dan labim, me i pou al ganny detri. Bann zabitan later ki zot non pa ankor ganny ekri dan liv lavi depi avan kreasyon lemonn, pou etonnen war sa bebet, akoz i ti deza vivan e aprezan i nepli. Me i pou aparet ankor.

⁹ Isi fodre posed disernman avek lasazes. Sa set latet, i sa set montanny ki sa fanm pe asiz lo la. Zot osi set lerwa.

¹⁰ Senk parmi zot in tonbe, enn i la; lot pa ankor vini. Kan i pou vini, i pou reste zis pour en pti pe letan.

¹¹ Kanta sa bebet ki ti deza vivan, me ki nepli, li menm i en wityenm lerwa. Anmenmtan, i enn parmi sa set, e i pou ganny detri.

¹² Sa dis korn ki ou'n war, i dis lerwa ki pa ankor konmans rennyen. Me zot pou ganny pouvwar pour renny en erdtan ansanm avek sa bebet.

¹³ Zot tou, zot annan menm lentansyon: Donn sa bebet zot pwisans ek zot pouvwar.

¹⁴ Zot pou konbat kont Zenn Mouton; me Zenn Mouton ki pou ganny laviktwar lo zot, akoz i Senyer tou senyer e Lerwa tou lerwa. I pou ganny laviktwar ansanm avek bann ki'n ganny apele, ki'n ganny swazir e ki fidel.

¹⁵ Lanz ti dir mwan ankor: Losean kot ou ti war sa fanm prostitye pe asiz lo la, se bann pep, bann lafoul dimoun, bann nasyon ek bann lalang.

¹⁶ Sa dis korn ki ou ti war ek sa bebet, pou ay sa prostitye. Zot pou depouy li avek tou sa ki i posede e kit li touni. Zot pou devor son laser e bril li avek dife.

¹⁷ Annefe, Bondye in plas dan zot leker son lavolonte pour akonpli son plan. Zot pou pas zot pouvwar avek sa bebet ziska ki Parol Bondye i ganny akonpli.

¹⁸ Anfen, sa fanm ki ou'n war, li menm sa gran lavil ki domin lo tou bann lerwa lo later.