Revelasyon 16 - Labib An Kreol Seselwa

Set Lakoup

¹ Answit, mon ti antann en lavwa for sorti dan Tanp. I ti dir sa set lanz: Al devers sa set lakoup lakoler Bondye lo later.

² Premye lanz ti ale e devers son lakoup lo later. Alor, en bann vilen boubou fermal ti aparet lo bann dimoun ki ti port mark sa bebet e ki ti ador son stati.

³ Dezyenm lanz ti devers son lakoup lo lanmer ki ti vin koman disan en dimoun mor. Tou sa ki ti vivan dan lanmer ti mor.

⁴ Trwazyenm lanz ti devers son lakoup dan bann larivyer ek tou bann sours delo. Zot ti sanze e vin disan.

⁵ Mon ti antann lanz ki ansarz delo dir: Ou ki sen, ki egziste, e ki ti egziste, ou bann zizman i zis.

⁶ Annefe, dimoun in vers disan ou bann sen ek ou bann profet, e ou, ou'n donn zot disan pour bwar. Zot in ganny sa ki zot merite.

⁷ Mon ti antann en lavwa sorti dan direksyon lotel. I ti dir: Wi Senyer Bondye Toupwisan! Ou zizman i vre e zis.

⁸ Katriyenm lanz ti devers son lakoup lo soley e i ti ganny drwa bril dimoun par son dife.

⁹ Dimoun ti ganny brile par en lasaler terib e zot ti ensilte Bondye ki annan pouvwar lo sa bann fleo. Zot ti refize repanti pour rann li glwar.

¹⁰ Senkyenm lanz ti devers son lakoup lo tronn sa bebet. Son rwayonm ti ganny anvlope dan fernwanr. Dimoun ti mord zot lalang avek douler.

¹¹ Zot ti ensilte Bondye dan lesyel, akoz zot douler ek zot bann boubou. Me zot pa ti repanti dan zot konportman.

¹² Sizyenm lanz ti devers son lakoup lo sa gran larivyer Efrat. Son delo ti sek pour prepar en semen pour bann lerwa ki sorti dan Les.

¹³ Alor, mon ti war trwa lespri enpir parey grenouy. Zot ti sorti dan lagel sa dragon, dan lagel sa bebet e dan labous sa fo profet.

¹⁴ Annefe, sa i bann lespri demon ki fer bann siny. Zot ti al kot bann lerwa lo later, pour rasanble zot pour konbat kan sa gran zour Bondye Toupwisan pou arive.

¹⁵ La mon pe vini koman en voler! Byennere sa enn ki reste vizilan, e ki gard son lenz lo li, pour li pa mars touni e les war son laont.

¹⁶ Bann lespri ti rasanble bann lerwa dan en landrwa ki apel Harmagedon dan lalang Ebre.

¹⁷ Setyenm lanz ti vers son lakoup dan lezer. En lavwa for, sorti dan Tanp kot tronn, ti dir: Tou in fini!

¹⁸ Ti annan zekler, tapaz en bann lavwa, loraz ek en gran tranblemandter. Zonm pa ti'n zanmen war en tel gran tranblemandter depi ki i lo later.

¹⁹ Sa gran lavil ti diviz an trwa parti. Bann lavil dan bann pei antye ti ganny detri. Alor, Bondye ti rapel gran Babilonn e i ti fer li bwar lakoup diven son gran lakoler.

²⁰ Tou bann zil ti disparet; personn pa ti war okenn montanny ankor.

²¹ Bann gro lagrel ki pez ziska 40 kilo ti sorti dan lesyel e tonm lo dimoun. Sa bann dimoun ti ensilte Bondye pour sa fleo lagrel ki ti vreman terib.