Revelasyon 15 - Labib An Kreol Seselwa

Lanz ek bann Fleo

¹ Apre, mon ti war en lot gran siny etonan dan lesyel: Mon ti war set lanz avek set fleo. Sa ti set dernyen fleo ki pou met en lafen avek lakoler Bondye.

² Apre, mon ti war sa ki ti resanble en lanmer an ver, melanze avek dife. Mon ti osi war bann ki ti'n ganny laviktwar lo sa bebet, lo son stati, e lo nimero ki koresponn avek son non. Zot ti pe debout lo lanmer an ver, avek dan zot lanmen, bann laarp ki Bondye ti'n donn zot.

³ Zot ti pe sant kantik Moiz, serviter Bondye, ek kantik Zenn Mouton: Senyer Bondye Toupwisan! Ou travay i gran e merveye. Lerwa bann nasyon! Tou ou bann plan i zis e vre.

⁴ Senyer! Lekel ki pou refize onor ou? Lekel ki pou refize rann ou glwar? Zis ou tousel ki sen. Tou nasyon pou vin ador ou, akoz ou zizman in ganny revele.

⁵ Apre sa, mon ti war latant Temwannyaz Bondye ouver dan lesyel.

⁶ Sa set lanz ki ti pe tenir sa set fleo ti sorti dan Tanp. Zot ti'n abiye dan rob linenn blan klate, avek sentir annor otour zot leren.

⁷ Enn parmi bann kat et vivan ti donn sa set lanz set lakoup annor, ranpli avek lakoler Bondye ki vivan pour touzour.

⁸ Tanp ti ranpli avek lafimen ki siny laglwar ek pwisans Bondye. Personn pa ti kapab antre dan Tanp, ziska ki sa set fleo ki ti avek sa set lanz ti'n ganny akonpli.