Revelasyon 14 - Labib An Kreol Seselwa

Zenn Mouton ek Son Pep

¹ Apre, mon ti gete, e mon ti war Zenn Mouton pe debout lo montanny Siyon. Avek li ti annan 144,000 dimoun ki ti port son non ek non son Papa ekri lo zot fron.

² Mon ti antann en lavwa sorti dan lesyel, parey tapaz en gro laroul, konmsi en gro loraz. Sa lavwa ki mon ti tande, ti parey son lanmizik laarp ki en mizisyen i fer sorti lo son lenstriman.

³ Zot ti sant en nouvo kantik devan tronn, devan sa kat et vivan ek bann ansyen. Personn pa ti kapab aprann sa kantik, apard sa 144,000 ki ti'n ganny reaste lo later.

⁴ Se sa bann ki pa'n sali zot avek bann fanm akoz zot ankor vyerz. Zot swiv Zenn Mouton partou kot i ale. Zot in ganny reaste parmi bann zonm pour ganny ofer koman bann premye fri devan Bondye e devan Zenn Mouton.

⁵ Dan zot labous pa'n sorti okenn mansonz; zot san okenn defo.

Trwa Lanz

⁶ Apre, mon ti war en lot lanz pe anvole tre o dan lesyel. I ti annan en Bonn Nouvel eternel pour anons tou zabitan later, nasyon, tribi, lalang ek pep.

⁷ I ti kriy avek en lavwa for: Annan respe pour Bondye e rann li glwar, akoz ler son zizman in arive. Ador sa enn ki'n kree lesyel, later, lanmer ek bann sours delo!

⁸ En lot lanz, en dezyenm, ti swiv sa premye lanz. I ti dir: I'n tonbe! I'n tonbe! Gran Babilonn in tonbe! I'n fer tou nasyon bwar son diven, diven lakoler son limoralite!

⁹ En lot lanz, en trwazyenm, ti swiv. I ti dir avek en lavwa for: Si en dimoun i ador sa bebet ek son stati e resevwar en mark lo son fron oubyen lo son lanmen,

¹⁰ li osi, i pou bwar diven lakoler Bondye ki'n ganny verse san melanz, dan lakoup son lakoler. I pou ganny tourmante dan dife ek souf, devan bann lanz sen e devan Zenn Mouton.

¹¹ Lafimen dife ki tourmant zot pou monte pour touzour. Bann ki ador sa bebet ek son stati, e nenport ki, ki resevwar mark son non, pou san repo, ni lizour, ni lannwit.

¹² Pour sa rezon, bann ki pour Bondye, zot devre persevere, obei bann komannman Bondye e gard lafwa dan Zezi.

¹³ Mon ti antann en lavwa sorti dan lesyel ki ti dir: Ekri: Byennere aprezan, bann dimoun ki mor an kominyon avek Senyer! Lespri i dir: Wi! Zot kapab repoze apre zot travay, akoz zot bann aksyon i swiv zot.

Rekolt lo Later

¹⁴ Answit, mon ti war en nyaz blan, e lo sa nyaz ti annan en personnaz ki ti resanble en zonm. I ti annan en kouronn annor lo latet e en fosi byen koupe dan lanmen.

¹⁵ En lot lanz ti sorti dan Tanp. Avek en lavwa for i ti kriy avek sa enn ki ti pe asiz lo sa nyaz: Lans ou fosi e rekolte. Ler in arive pour rekolte, akoz later in mir pour fer rekolt.

¹⁶ Sa enn ki ti pe asiz lo nyaz ti anvoy fosi lo later e rekolt ti ganny fer.

¹⁷ En lot lanz ti sorti dan Tanp ki dan lesyel. Li osi, i ti annan en fosi byen koupe.

¹⁸ Answit, en lot lanz, ki ti annan pouvwar lo dife, ti sorti kot lotel. I ti kriy avek en lavwa for avek sa enn ki ti annan fosi byen koupe. I ti dir li: Anvoy ou fosi e fer rekolt bann grap rezen lo later, akoz rezen in mir.

¹⁹ Alor, lanz ti anvoy son fosi lo later, e i ti rekolte bann grap rezen ki lo later, e i ti zet sa bann grap rezen dan sa gran preswar lakoler Bondye.

²⁰ Rezen ti ganny kraze dan preswar anba lipye, an deor lavil. Disan ki ti koule sorti dan preswar ti mont ziska oter labous bann seval, lo en distans 300 kilomet.