Revelasyon 13 - Labib An Kreol Seselwa

Vizyon De Bebet

¹ Apre sa, mon ti war en bebet ki ti monte sorti dan lanmer. I ti annan dis korn ek set latet. Lo sak korn, ti annan en kouronn e lo sa bann latet, ti annan bann non blasfenm kont Bondye.

² Sa bebet ki mon ti war, ti resanble en leopar. Son bann lapat ti parey lapat en lours e son lagel ti parey lagel en lyon. Dragon ti donn li tou son pwisans, son tronn ek en gran pouvwar.

³ Enn bann latet sa bebet ti paret i'n ganny blese anmor, me sa blesir mortel ti'n geri. Later antye ti dan ladmirasyon e ti swiv sa bebet partou.

⁴ Tou dimoun ti ador sa dragon, akoz i ti'n donn son pouvwar sa bebet. Zot ti azenou devan sa bebet. Zot ti dir: Lekel ki parey sa bebet? Lekel ki kapab lager kont li?

⁵ Sa bebet ti ganny en labous pour li kapab pronons bann parol arogan, e blasfenm Bondye. I ti ganny lotorite pour egzers son pouvwar pandan 42 mwan.

⁶ I ti ouver son labous pour koz blasfenm kont Bondye e kont son non, son demer ek bann zabitan lesyel.

⁷ I ti ganny permisyon fer lager kont pep Bondye e ganny laviktwar lo zot. I ti ganny pouvwar lo tou tribi, pep, lalang ek tou nasyon.

⁸ Tou zabitan later, tou bann ki zot non pa'n ganny ekri depi konmansman lemonn, dan liv lavi Zenn Mouton ki'n ganny egorze, pou prostern devan li.

⁹ Sa enn ki annan zorey pour tande, ekoute:

¹⁰ Sa enn ki devre vin prizonnyen, pou al dan prizon. Sa enn ki devre ganny touye avek lepe, pou ganny touye avek lepe. Pour sa rezon ki pep Bondye i devre annan pasyans e proklanm son lafwa.

Vizyon Dezyenm Bebet

¹¹ Apre sa, mon ti war en lot bebet ki ti sorti dan later. I ti annan de korn parey en zenn mouton, e i ti koz koman en dragon.

¹² I ti egzers tou pouvwar sa premye bebet, lanmenm devan li. I ti obliz later ek son bann zabitan ador sa premye bebet ki son blesir ti'n geri.

¹³ Sa bebet ti fer bann gran mirak. I ti menm fer dife desann, sorti dan lesyel, devan tou dimoun.

¹⁴ Par sa bann mirak ki i ti'n ganny pouvwar fer dan prezans sa premye bebet, i ti tronp bann zabitan later. I ti demann zot fer en stati sa bebet ki ti'n ganny blese par lepe e ki'n reviv.

¹⁵ I ti ganny pouvwar fer stati sa premye bebet vin vivan, de sort ki stati sa bebet ti kapab koze. I ti fer touy tou sa ki pa ti ador li.

¹⁶ I ti obliz osi tou dimoun, pti koman gran, ris koman pov, lib koman lesklav, pou ganny marke lo zot lanmen drwat oubyen lo zot fron.

¹⁷ Ensi, personn pa ti kapab aste, ni vann, san ki i annan sa mark, setadir, non sa bebet, oubyen sif ki reprezant son non.

¹⁸ Isi nou bezwen posed lasazes. Sa enn ki annan disernman, ava kalkil nimero sa bebet, akoz sa sif i koresponn avek non en zonm. Sa sif i 666.