Revelasyon 12 - Labib An Kreol Seselwa

Vizyon Zan: En Fanm ek En Dragon

¹ En gran siny ti aparet dan lesyel: En fanm abiye dan soley, lalin anba son lipye e en kouronn 12 zetwal lo son latet.

² I ti ansent e i ti kriye avek douler ek soufrans lanfantman.

³ Answit, en lot siny ti aparet dan lesyel: En gro dragon, rouz koman dife, ki ti annan set latet ek dis korn. Lo sak latet ti annan en kouronn.

⁴ Son lake ti balye en tyer bann zetwal dan lesyel e zet zot lo later. Sa dragon ti debout devan sa fanm ki ti pe al akouse, pour li devor son zanfan koman i ne.

⁵ Sa fanm ti ganny en garson, en zanfan mal, ki pou diriz tou nasyon avek en baton an fer. Me son zanfan ti ganny anmennen kot Bondye, e kot son tronn.

⁶ Sa fanm ti sov dan dezer dan en landrwa ki Bondye ti'n prepare pour li, kot i ava ganny nouri pandan 1,260 zour.

⁷ Alor, ti annan lager dan lesyel: Mikael avek son bann lanz ti lager kont dragon. Dragon avek son bann lanz ti osi lager kont li.

⁸ Me dragon pa ti ganny laviktwar. Alor, ti nepli annan plas pour zot dan lesyel.

⁹ Sa gran dragon, ti ganny zet deor. Li menm li sa serpan lantikite, ki apel dyab oubyen Satan, e ki tronp lemonn antye. I ti ganny zete lo later ansanm avek son bann lanz.

¹⁰ Alor, mon ti antann en lavwa for sorti dan lesyel ki ti dir: Aprezan, letan delivrans, pwisans, renny nou Bondye, ek lotorite son Mesi in ganny etabli. Annefe, lakizater nou bann frer devan Bondye, lizour koman aswar, in ganny zet deor.

¹¹ Par disan Zenn Mouton e par zot temwannyaz, zot in ganny laviktwar lo li. Zot in aksepte donn zot lavi ziska lanmor.

¹² Lesyel ek tou bann zabitan! Rezoui! Later ek lanmer! Maler lo zot, akoz dyab in desann kot zot avek en gran lakoler; akoz i konnen ki pa reste li bokou letan.

¹³ Kan dragon ti realize ki i ti'n ganny zete lo later, i ti konmans swiv sa fanm ki ti'n ganny en pti garson.

¹⁴ Me sa fanm ti ganny sa de lezel en gran leg. I ti anvole ziska dan sa landrwa rezerve pour li dan dezer. La, i ti ganny nouri pandan 3 an edmi, lwen avek latak sa serpan.

¹⁵ Alor, sa serpan ti vomi delo parey en gran larivyer, deryer sa fanm, pour li ganny trennen.

¹⁶ Me later ti vin osekour sa fanm: I ti ouver son labous, e anval sa larivyer ki sorti dan lagel dragon.

¹⁷ Alor, dragon ti ankoler avek sa fanm. I ti ale pour fer lager kont leres desandans sa fanm, kont tou sa bann ki obei komannman Bondye e ki reste fidel avek temwannyaz Zezi.

¹⁸ Apre, i ti al met li debout lo bor lanmer.