Revelasyon 11 - Labib An Kreol Seselwa

De Temwen

¹ Apre, zot ti donn mwan en baton ki servi pour mezire, e zot ti dir mwan: Leve! Al mezir Tanp Bondye ek lotel. Kont osi sa bann ki vin adore dan Tanp.

² Me pa mezir lakour eksteryer Tanp, akoz i'n ganny abandonnen avek bann nasyon ki pou kraz lavil sen pandan 42 mwan.

³ Mon pou anvoy mon de temwen abiye dan lenz dey. Zot pou profetize pandan 1,260 zour.

⁴ Sa de temwen i sa de pye zoliv ek sa de portlanp ki devan Senyer later.

⁵ Si i annan ki esey fer zot dimal, dife i sorti dan zot labous e detri zot lennmi. Konmsa, dimoun ki pou anvi fer zot ditor, pou ganny detri.

⁶ Zot annan pouvwar ferm lesyel pour ki lapli pa tonbe pandan letan ki zot pe profetize. Zot annan pouvwar sanz delo an disan. Zot osi annan pouvwar frap later avek toudsort kalite fleo sak fwa ki zot oule.

⁷ Me kan zot ava'n fini rann temwannyaz, sa bebet ki monte sorti dan labim, pou atak zot. I pou ganny laviktwar lo zot e touy zot.

⁸ Zot kadav pou reste dan lari sa gran lavil, ki apel senbolikman, Sodonm ek Lezip, lanmenm kot zot Senyer ti ganny krisifye.

⁹ Pandan trwa zour edmi, dimoun sorti dan tou pep, tou tribi, tou lalang ek tou nasyon pou get zot kadav. Pourtan, zot pou refize les zot ganny antere.

¹⁰ Bann zabitan later pou dan kontantman akoz zot lanmor. Zot pou fete e anvoy kado pour kanmarad, akoz sa de profet ti en tourman pour bann zabitan later.

¹¹ Me apre sa trwa zour edmi, en souf lavi ki sorti kot Bondye ti antre dan zot. Zot ti debout lo zot de lipye. Alor, en gran lafreyer ti tonm lo bann ki ti war zot.

¹² Sa de profet ti antann en lavwa for sorti dan lesyel, ki ti dir zot: Mont isi! Zot ti mont dan lesyel dan en nyaz, devan tou zot bann lennmi.

¹³ Pandan sa menm moman, ti annan en gran tranblemandter, e en dizyenm parti lavil ti tonbe. 7,000 dimoun ti mor. Bann sirvivan ti ranpli avek lafreyer e zot ti rann glwar Bondye ki dan lesyel.

¹⁴ Dezyenm maler i'n pase. La trwazyenm pe vini byento.

Setyenm Tronpet

¹⁵ Setyenm lanz ti soufle dan son tronpet. Dan lesyel, bann lavwa tre for ti rezonnen. Zot ti pe dir: Aprezan, rwayonm lemonn in vin pour nou Senyer, e pour son Kris. I pou rennyen pour touzour.

¹⁶ Sa 24 ansyen ki ti pe asize lo zot tronn devan Bondye ti tonm figir kont later e ador Bondye.

¹⁷ Zot ti dir: Nou loue ou, Senyer, Bondye liniver, ki egziste, e ki ti egziste. Ou'n servi ou gran pouvwar pour etabli ou renny!

¹⁸ Bann nasyon ti met zot ankoler. Me aprezan, ou lakoler ki'n monte. Letan pour ziz bann mor in arive. Letan pour rekonpans ou bann serviter bann profet, tou bann ki pour ou, e ki annan respe pour ou non, gran koman pti, in arive. Letan pour detri bann ki detri later, in arive!

¹⁹ Alor, Tanp Bondye dan lesyel ti ouver, e Kof Lalyans ti aparet dan son Tanp. Ti annan zekler, tapaz en bann lavwa, en seri loraz, tranblemandter ek gro lagrel.