Revelasyon 1 - Labib An Kreol Seselwa

¹ Sa liv i Revelasyon Zezi-Kri ki Bondye ti donn li pour li montre son bann serviter sa ki devre arive byento. Kris in anvoy son lanz kot son serviter Zan, pour fer li konnen.

² Zan in servi koman temwen. I'n anons mesaz Bondye ek temwannyaz Zezi-Kri lo tou sa ki i'n war.

³ Byennere, sa enn ki lir bann parol sa profesi! Byennere bann ki ekout e gard sa ki'n ekri ladan! Annefe, letan i pros pour sa bann levennman realize.

Salitasyon pour Set Legliz Lazi

⁴ Delapar Zan, pour sa set Legliz ki dan provens Lazi. Lagras ek lape delapar Bondye ki egziste, ki ti egziste e ki pe vini; delapar sa set Lespri ki devan son tronn,

⁵ e delapar Zezi-Kri, temwen fidel, premye ne parmi bann mor, sef parmi bann lerwa later. Zezi-Kri i kontan nou. Par son disan, i'n delivre nou avek tou nou bann pese.

⁶ I'n fer nou vin en rwayonm pret pour servi Bondye son Papa. Laglwar, ek pouvwar i pour li pour touzour! Amenn.

⁷ La i pe vini parmi bann nyaz, e tou dimoun pou war li; menm sa bann ki ti transpers li. Tou bann nasyon lo later pou lamante lo son size. Wi! Amenn.

⁸ La sa ki Senyer Bondye i deklare: Mwan menm Alfa ek Omega, sa enn ki egziste, ki ti egziste e ki pe vini, Bondye Toupwisan.

Vizyon Zan lo Zil Patmos

⁹ Mwan menm Zan, zot frer, ki'n partisip dan soufrans, dan rwayote, e ki'n andire avek pasyans, ini avek Zezi. Mon ti annegzil lo zil Patmos, akoz Parol Bondye ek temwannyaz Zezi.

¹⁰ Zour Senyer, mon ti ganny sezi par Lespri. Mon ti antann en lavwa for deryer mwan parey son en tronpet,

¹¹ ki ti dir: Ekri sa ki ou war dan en liv, e anvoy li kot sa set Legliz ki Efez, Smirn, Perganm, Tyatir, Sard, Filadelfi ek Laodise.

¹² Mon ti vir deryer pour war lekel ki ti pe koz avek mwan. Alor, mon ti war set portlanp annor.

¹³ Omilye sa set portlanp, ti annan en personnaz ki ti resanble en zonm. I ti'n met en rob long ki ariv ziska son lipye e en sentir annor otour son leren.

¹⁴ Son latet ek son seve ti blan parey lalenn, oubyen koman lannez. Son lizye ti parey en laflanm dife.

¹⁵ Son lipye ti koman bronz brile ki'n ganny pirifye dan four. Son lavwa ti koman tapaz gro delo ki pe koule.

¹⁶ Dan son lanmen drwat ti annan set zetwal. En lepe ki koup de kote ti sorti dan son labous e son figir ti koman soley midi, ler i pe tap avek tou son larder.

¹⁷ Kan mon ti war li, mon ti tonm dan son lipye koman en dimoun mor. I ti poz son lanmen drwat lo mwan. I ti dir: Pa per! Mwan menm Alfa e Omega; Premye e Dernyen;

¹⁸ sa enn ki vivan. Mon ti'n mor, me la mon vivan pour touzour. Mon posed lakle lanmor ek lakle lemonn lanmor.

¹⁹ Aprezan, ekri sa ki ou'n war, sa ki pe pase aprezan, e sa ki pou arive apre.

²⁰ Pour sa ki konsern mister sa set zetwal ki ou'n war dan mon lanmen drwat, e sa set portlanp annor, la zot sinifikasyon: Sa set zetwal i bann lanz sa set Legliz; sa set portlanp, i sa set Legliz.