Psonm 88 - Labib An Kreol Seselwa

Apel Osekour

Psonm Fanmir Kore.

¹ SENYER, Bondye mon Sover! Lizour, lannwit mon kriy ver ou.

² Akey mon lapriyer ki mont ver ou; port atansyon lo mon lapenn.

³ Mon lavi i ranpli avek maler; mon pre pour antre dan lemonn lanmor.

⁴ Mon ganny konte parmi sa bann ki annan en lipye dan latonm, parey sa bann ki nepli annan okenn lafors;

⁵ parey sa enn ki'n ganny oubliye parmi bann ki'n mor; parey sa enn ki'n ganny touye e ki repoz dan son latonm; parey sa enn ki ou'n oubliy konpletman, e ki ou nepli antren.

⁶ Ou'n anvoy mwan dan fon latonm, dan profonder fernwanr.

⁷ Ou lakoler pe pez lo mwan; ou bann gro laroul i kraz mwan.

⁸ Ou'n fer mon bann zanmi abandonn mwan; ou'n fer mwan vin degoutan pour zot. Mon'n ganny anfermen san okenn sans sorti.

⁹ Mon lizye in abimen avek sagren. Tou le zour, mon apel ou SENYER e mon lev mon lanmen ver ou.

¹⁰ Eski ou fer mervey pour dimoun ki'n mor? Eski bann mor i leve pour loue ou?

¹¹ Lekel ki koz lo ou fidelite dan latonm? Lekel parmi bann mor, ki pou rakont ou fidelite?

¹² Eski dimoun dan gro fernwanr i konn bann mervey ki ou'n fer? Eski dan sa lemonn oubliye, zot konnen ki ou reste fidel?

¹³ SENYER! Mwan, mon pe kriy ver ou. Tou le bomaten, mon lapriyer i devan ou.

¹⁴ SENYER! Akoz ou rezet mwan? Akoz ou vir ou ledo avek mwan?

¹⁵ Depi mon lanfans, mon ti malere e pre pour mor. Mon'n viv dan lafreyer, dan dezespwar.

¹⁶ Dife ou lakoler in pas lo mwan; ou bann latak in detri mwan.

¹⁷ Tou le zour, zot in antour mwan parey en linondasyon; zot in anserkle mwan lo tou kote.

¹⁸ Ou'n fer mon bann zanmi abandonn mwan; fernwanr i mon zanmi.