Psonm 87 - Labib An Kreol Seselwa

An Loner Zerizalenm

Psonm Fanmir Kore.

¹ SENYER in konstri son lavil lo montanny sakre.

² SENYER i kontan lavil Siyon plis ki tou lezot lavil dan Izrael.

³ Bann bon parol i ganny dir lo size lavil Bondye.

⁴ Parmi sa bann ki konn mwan, i annan Lezip ek Babilonn; i annan osi bann Filisten, bann zabitan Tir ek Letyopi. Zot dir: Sa enn, in ne laba.

⁵ Me lo size Zerizalenm zot dir: Zot tou, zot in ne laba, akoz Bondye Treo, li menm ki konsolid sa lavil.

⁶ SENYER i fer lalis bann pep. I note: Sa enn, i'n ne laba.

⁷ Ansanm, bann santer ek bann danser zot dir: Zerizalenm i landrwa kot nou reste.