Psonm 79 - Labib An Kreol Seselwa

Lapriyer pour Demann Delivrans Nasyon

Psonm Asaf.

¹ Mon Bondye! Bann etranze in anvai ou pei. Zot in profann ou tanp sen. Zot in fer Zerizalenm vin en ta ros.

² Zot in donn bann votour lekor ou bann serviter pour devore e livre kadav ou bann fidel avek bann zannimo sovaz.

³ Zot in fer disan koule parey delo, toultour Zerizalenm. Ti napa personn pour anter dimoun mor.

⁴ Nou ganny ensilte par bann nasyon vwazen; zot gognard nou, zot riy nou.

⁵ Ziska kan ou pou kontinyen ankoler kont nou? Eski ou zalouzi pou kontinyen brile parey dife?

⁶ Fer ou lakoler tourn lo bann nasyon ki pa konn ou e lo bann rwayonm ki pa ador ou.

⁷ Annefe, zot in devor desandan Zakob e devaste zot teritwar.

⁸ Pa pini nou pour pese nou bann zanset. Pa tarde pour montre ou konpasyon pour nou. Nou'n tonm byen ba.

⁹ Mon Bondye, nou sover! Vin sekour nou pour montre ou grander. Pour loner ou non, delivre nou e pardonn nou.

¹⁰ Akoz fodre les bann nasyon dir: Oli son Bondye? Devan nou, fer bann nasyon war koman ou vanz disan ou bann serviter ki zot ti fer koule!

¹¹ Ekout lapel bann prizonnyen. Par lafors ou lebra, prezerv lavi bann ki'n ganny kondannen anmor.

¹² Bann pep vwazen in ensilte ou, SENYER. Fer zot pey set fwa bann lensilt ki zot in fer ou.

¹³ Alor, nou ou troupo, nou ava loue ou pour touzour. Nou ava sant ou louanz pour touzour.