Psonm 76 - Labib An Kreol Seselwa

Laviktwar I pour Bondye

Psonm Asaf.

¹ Bondye i renonmen dan Zida. Son non i gran dan Izrael.

² In etabli son latant dan Zerizalenm. Son demer i dan Siyon.

³ La, i ti kas bann dart laflanm, bann boukliye, bann lepe ek bann zarm lager.

⁴ Ou laglwar i gran; i pli manifik ki en montanny piyaz lager.

⁵ Bann brav gerye in ganny arase tou sa ki zot ti'n sezi. Zot in tonm dan zot dernyen sonmey. Personn parmi zot pa'n kapab servi zot lafors.

⁶ Bondye Zakob! Kan ou ti menas zot, bann kavalye ek zot seval ti tonm san konnesans.

⁷ Ou formidab! Lekel ki kapab reste debout devan ou kan ou lakoler i leve?

⁸ Lao dan lesyel, ou rann ou zizman. Zabitan later i per e zot reste trankil

⁹ ler Bondye i leve pour li rann zizman, pour li sov tou bann malere lo later.

¹⁰ Menm lakoler bann imen i rann ou glwar; ou antour ou avek leres ou lakoler.

¹¹ Fer ou ve e gard ou promes anver SENYER ou Bondye. Tou bann nasyon dan zalantour ava anmenn kado pour sa enn ki formidab.

¹² I abes lorgey bann sef, i met lafreyer dan bann lerwa lo later.