Psonm 75 - Labib An Kreol Seselwa

Bondye ki Ziz

Psonm Asaf.

¹ Mon Bondye! Nou loue ou. Nou dir ou mersi; ou non i pros avek nou. Nou rakont ou bann mervey.

² Mon pou fikse letan kan mon pou ziz avek drwatir.

³ Later i kapab tranble avek tou son bann zabitan, me mon gard son fondasyon ferm.

⁴ Mon dir avek bann arogan: Pa fer vantar. Avek bann malfeter: Pa vant zot lekor.

⁵ Ase fer vantar, ase koz avek larogans.

⁶ Grander pa sorti ni dan Les, ni dan Was; pa menm dan dezer.

⁷ Bondye ki ziz; i abes sa enn e i elev sa lot.

⁸ SENYER i tenir dan son lanmen en lakoup ranpli avek diven for, byen fermante; i pou donn en pe bann malfeter lo later. Zot pou bwar ziska lanmar.

⁹ Me mwan, mon pou kontinyen loue li. Mon pou sant louanz pour Bondye Zakob.

¹⁰ Bondye pou detri lorgey bann malfeter; me i pou fer ogmante pouvwar bann zis.