Psonm 74 - Labib An Kreol Seselwa

Lapriyer pour Demann Delivrans Pei

Poenm Asaf.

¹ Mon Bondye! Akoz ou'n rezet nou pour touzour? Akoz sa gran lakoler kont nou, ou troupo?

² Mazin ou pep ki ou ti swazir depi lontan, tribi ki ou'n sove pour fer li ou pep. Mazin montanny Siyon kot ou'n fer ou demer.

³ Vin kot sa bann ki'n ganny detri pour touzour. Lennmi in demoli tou sa ki ti dan ou tanp.

⁴ La kot ou ti rankontre nou, zot in plant zot bannyer.

⁵ Ou ti ava krwar bann zonm ki pe koup pye dibwa dan lafore, avek zot lars.

⁶ A koud lars ek marto, zot in demoli tou bann skilptir an bwa.

⁷ Zot in kraz tou e met dife dan ou sanktyer; zot in profann landrwa sen kot ou reste.

⁸ Zot ti dir dan zot menm: Annou kraz zot konpletman. Zot ti met dife dan tou bann landrwa sen dan pei, kot zot ti rankontre Bondye.

⁹ Nou nepli war ou prezans. Nou nepli annan okenn profet. Personn parmi nou pa konnen ziska kan sa sityasyon pou dire.

¹⁰ Mon Bondye! Ziska kan ou bann lennmi pou kontinyen riy ou? Eski zot pou mepriz ou non pour touzour?

¹¹ Akoz ou pa lev ou lanmen drwat? Akoz ou reste lebra krwaze?

¹² Pourtan, Bondye i mon Lerwa depi touzour. Ou'n donn nou souvan laviktwar dan nou pei.

¹³ Avek ou lanmen pwisan, ou ti separ lanmer an de e kraz latet bann mons lanmer.

¹⁴ Ou'n kraz bann latet Leviatan. Ou'n donn li pour manze avek en pep ki reste dan dezer.

¹⁵ Ou ki'n fer koule bann sours delo ek bann larivyer, ou'n fer sek bann gran larivyer ki pa zanmen sek.

¹⁶ Lizour i pour ou, lannwit i pour ou. Ou ki'n enstal lalin ek soley.

¹⁷ Ou ki'n fikse later avek tou son bann balizaz; ou ki'n kre sezon lete ek liver.

¹⁸ Pa oubliye SENYER: Ou bann lennmi pe ensilte ou. En pep fou pe denigre ou non.

¹⁹ Pa les ou tourtrel ganny manze par bann zannimo sovaz. Pa oubliy bann malere parmi ou pep pour touzour.

²⁰ Mazin ou lalyans; vyolans pe kasyet dan bann landrwa fernwanr.

²¹ Pa les bann dimoun mwen fortinen ganny dezonore. Fer ki bann pov ek bann malere ava loue ou non.

²² Leve SENYER! Vin defann ou lakoz. Mazinen ki mannyer en bann fou pe touzour ensilte ou.

²³ Pa oubliye: Ou bann ladverser pe fer tapaz; ou bann lennmi pa arete kriye.