Psonm 69 - Labib An Kreol Seselwa

Lapriyer pour Demann Sekour

Pour sef lakoral. Lo ler: Bann Lis sorti kot David.

¹ Mon Bondye! Sov mwan. Delo in mont ziska mon likou.

² Mon pe anfons dan labou, mon napa en landrwa solid pour mwan poz mon lipye. Mon pe anfons dan kre e kouran pe anmenn mwan.

³ Mon fatige afors kriye; mon lagorz i sek. Mon lizye i fatige afors esper mon Bondye.

⁴ Sa bann ki ay mwan san okenn rezon, zot pli bokou ki seve lo mon latet; en kantite zot i oule detri mwan; mon bann lennmi i oule detri mwan avek zot fo lakizasyon. Eski fodre mon rann sa ki mon pa'n vole?

⁵ Mon Bondye! Devan ou, mon tor pa en sekre; ou konn byen tou mon bann pese.

⁶ Senyer BONDYE liniver! Fodre pa ki dimoun ki'n met zot lespwar dan ou i ganny imilye akoz mwan. Bondye Izrael! Ki personn ki'n met son konfyans dan ou i ganny abese akoz mwan.

⁷ Pour ou, mon aksepte ganny imilye; laont i kouver mon figir.

⁸ Mon'n vin en etranze pour mon bann frer, en nanryen ditou, menm anver bann zanfan mon manman.

⁹ Lanmour ki mon annan pour ou tanp i brile dan mwan parey en dife. Bann lensilt ki ganny fer kont ou i retonm lo mwan.

¹⁰ Ler mon ti plere e zennen, mon ti ganny ensilte.

¹¹ Zot ti fer zistwar lo mwan ler mon ti met lenz dey.

¹² Bann ki asiz obor semen i malparl mwan; bann soular i konpoz mwan dan sanson.

¹³ SENYER! Mwan, mon adres ou mon lapriyer. Mon Bondye! Reponn mwan dan ou letan favorab. Dan labondans ou fidelite, reponn mwan, ou ki vreman mon Sover.

¹⁴ Sov mwan! Pa les mwan anfons dan labou. Delivre mwan dan lanmen mon bann lennmi e dan fon lanmer.

¹⁵ Pa les kouran delo trenn mwan, ni les mwan desann dan gran fon, ni latonm ferm lo mwan.

¹⁶ SENYER, Reponn mwan! Ou fidelite i fer mwan dibyen. Dan ou gran konpasyon, tourn ver mwan!

¹⁷ Pa vir ledo avek ou serviter, akoz mon dan maler. Pa tarde pou reponn mwan.

¹⁸ Vin pros avek mwan, sov mwan, delivre mwan akoz mon bann lennmi.

¹⁹ Ou konn bann lensilt ki mon gannyen, mon laont ek mon dezoner; ou konn tou mon bann lennmi.

²⁰ Mon leker i fermal afors ganny ensilte; mon dan dezespwar. Mon vin rod senpati, me personn pa pran pitye pour mwan, personn pa'n vin rekonfort mwan.

²¹ Zot donn mwan pwazon pour manze. Ler mon ti swaf, zot ti donn mwan vineg pour bwar.

²² Zot bann bon repa pou vin en latrap pour zot e en pyez pour zot bann zanmi.

²³ Zot lizye ava vin sonm e zot pou nepli war kler. Zot leren ava touzour kourbe.

²⁴ Devers ou lakoler lo zot! Ki i bril zot parey en dife!

²⁵ Detri zot kanpman e ki personn pa reste dan son latant!

²⁶ Annefe, zot pe persekit sa bann ki ou'n deza pini; zot kont bann kou ki i'n gannyen.

²⁷ Fer en lalis tou zot bann krim, pour zot pa zanmen ganny ou faver.

²⁸ Efas zot non dan liv lavi! Pa kont zot parmi bann zis!

²⁹ Me mwan, mon malere e mon pe soufer; Mon Bondye! Ou sekour ki pour protez mwan!

³⁰ Mon pou loue non Bondye par en kantik; mon pou anons son grander avek rekonesans.

³¹ Sa i ava fer plezir SENYER plis ki en bef oubyen en toro avek korn ek sabo.

³² Ler zot ava war sa, bann ki'n ganny imilye ava dan lazwa. Sa bann ki rod Bondye ava repran kouraz.

³³ Annefe, SENYER i ekout dimoun ki dan bezwen. I pa rezet son bann fidel ki dan prizon.

³⁴ Lesyel, later, lanmer e tou sa ki bouze i rann li laglwar,

³⁵ akoz Bondye pou sov Zerizalenm. I pou rekonstri bann lavil dan Zida. Son pep pou vin viv la e sa pei ava pour zot.

³⁶ Bann desandan son bann serviter pou erit sa later e sa bann ki kontan son non pou reste la.