Psonm 64 - Labib An Kreol Seselwa

Lapriyer pour Demann Proteksyon

En psonm David. Pour sef lakoral.

¹ Mon Bondye! Ekout mon konplent. Prezerv mwan kont lafreyer lennmi.

² Fer mwan sape dan konplo sekre ki bann malfeter pe fer.

³ Zot fit zot lalang parey en lepe. Zot parol i anmer. Zot blese parey en dart anpwazonnen

⁴ ki zot tire lo bann inosan depi kot zot in kasyet. San averti, zot tire san okenn lafreyer.

⁵ Zot ankouraz kanmarad dan sa ki mal; zot kalkile kote zot pou met zot latrap; zot dir: Lekel ki pou war nou?

⁶ Zot prepar zot bann move kou. Zot dir: Nou'n byen kalkil nou plan. Lekel ki kapab konn profonder leker imen?

⁷ Me Bondye pou tir son bann dart lo zot; san tarde, zot pou ganny blese.

⁸ Zot prop parol pou fer zot tonbe. Dimoun ki war zot i balans latet.

⁹ Tou dimoun pou per; zot pou proklanm travay Bondye, e medit lo sa ki i'n fer.

¹⁰ Dimoun ki zis! Rezoui dan SENYER. Pran li pour labri! Dimoun ki leker i drwat ava dan lazwa.