Psonm 62 - Labib An Kreol Seselwa

Konfyans dan Proteksyon Bondye

En psonm David. Pour sef lakoral. Dapre Yedoutoun.

¹ Zis Bondye ki fer mwan konn trankilite. Zis li tousel ki kapab sov mwan.

² Zis li mon Ros protekter e li tousel ki sov mwan, mon fortres; mon pa pou zanmen tonbe.

³ Ziska kan zot pou antoure pour atak en dimoun? Eski zot oule zet li parey en miray ki pre pour tonbe, oubyen en baraz ki'n kabannen?

⁴ Zot mazin zis sali loner en dimoun enportan. Zot plezir i dan mansonz; zot dir zoli parol avek zot labous, me dan fon zot leker zot modi li.

⁵ Zis Bondye ki fer mwan konn trankilite, akoz mon'n met mon lespwar dan li.

⁶ Li tousel mon Ros protekter, mon Sover, mon fortres. Mon pa pou zanmen tonbe.

⁷ Mon delivrans ek mon laglwar i repoz lo Bondye mon pwisan protekter, mon labri.

⁸ Pep! Fer li touzour konfyans. Dir li sa ki zot annan lo zot leker. Bondye i en labri pour nou.

⁹ Bann et imen i parey en souf respirasyon; bann zabitan later, zot manter. Si zot mont lo en balans, zot pa pou pez plis ki en souf.

¹⁰ Pa met ou konfyans dan vyolans; pa esper vin ris avek keksoz vole. Menm si ou larises i ogmante, pa met ou leker lo la.

¹¹ Bondye in dir e mon'n antann repete: Zis Bondye tousel ki posed lapwisans.

¹² SENYER! Ou fidelite i pour touzour. Ou rekonpans sakenn dapre son bann aksyon.