Psonm 61 - Labib An Kreol Seselwa

Lapriyer pour Demann Proteksyon

Poenm David. Pour sef lakoral. Avek bann lenstriman akord.

¹ Mon Bondye! Mon kriy ou. Ekout mwan. Ekout mon lapriyer.

² Depi dan bout later, mon pe kriy ou ler mon dan dekourazman. Kondwir mwan lo sa ros kot mon pa kapab arive.

³ Ou menm mon protekter, mon fortres kont lennmi.

⁴ Mon ti ava anvi reste dan ou sanktyer pour tou mon lavi e ganny en labri anba ou lezel.

⁵ Mon Bondye! Ou'n egzos mon bann swe e donn bann ki ador ou, zot leritaz.

⁶ Donn lerwa en long lavi. Fer li viv ankor pandan plizyer zenerasyon,

⁷ pour ki i reste lo tronn pour touzour devan ou. Mon Bondye! Dan ou fidelite ek ou bonte, protez li.

⁸ Alor, mon pou touzour loue ou non e sak zour mon pou gard mon promes.